Сэргэ Бэс фермерэ Александр Фомин бааһынатыгар үүннэрбит хортуоппуйун нэһилиэнньэни кыһыннары хааччыйар. Маныаха агропромышленнай комплекс салааларын бородууксуйатын оҥорон таһаарыыны улаатыннарыыга туһуламмыт өрөспүүбүлүкэ судаарыстыбаннай бырагырааматын инновационнай бырайыагынан саҥа технологиянан таҥыллыбыт, салгын температуратын хонтуруоллуур улахан ыскылаат ааспыт сылга тутуллан үлэҕэ киирбитэ улахан көмөлөөх буолла.
Амма, Сулҕаччы, Сэргэ Бэс Соморсун, Мээндиги, Абаҕа, Бөтүҥ, Чапылҕан ыаллара, маҕаһыыннар, тэрилтэлэр Сэргэ Бэскэ үлэлии — хамсыы олорор бааһынай хаһаайыстыба салайааччыта Александр Фомин үүннэрбит хортуоппуйун кыһыннары атыылаһан абыраннылар. Сахабыт сирин тыйыс тымныытын тулуйар аныгы технологиянан үлэлиир 500 туонна хортуоппуйу харайар тутуу өрөспүүбүлүкэҕэ бааһынай хаһаайыстыбаларга бастакынан тутуллан улууспут дьоно — сэргэтэ сүрүн аһылыгын хааччына олорор. Манна Николай Данилов салайааччылаах түөрт киһилээх биригээдэ ыскылаат үлэлиир ситимин хонтуруоллуур, хортуоппуйу наардыыр, хаалыыр. Экспедитор Василий Максимов сакаас киириитинэн нэдиэлэҕэ түөртэ — биэстэ Аммаҕа, биирдэ — иккитэ Чурапчы эҥээр отут куулу массыынатыгар тиэйэн аадырыска диэри босхо тирэрдэр.
«Ааспыт сылга тутуллубут улахан овощехранилищебыт бу кыһын тургутууну ааста, көрдөрүүтэ күүппүппүт курдук буолла, хортуоппуйбут хаачыстыбата үчүгэй диэн астынабыт. Урукку өттүгэр харайар сирбит кыараҕас буолан хортуоппуйбутун күһүн эрдэ батара сатыыр эбит буоллахпытына, билигин улууспут олохтоохторун хойукка диэри хааччыйар кыахтанныбыт. Атыыга «розара» уонна «гала» диэн хортуоппуй икки суорда баар. Розара ый курдугунан бүтэрэ буолуо, оттон маҥан хортуоппуй элбэх. Дьон сакааһынан аадырыска диэри босхо тиэйэн илдьэбит. Киилэтэ 72 солкуобай, куула 2300 солкуобай буолар. Сиэмэ хортуоппуйу кулун тутар ортотуттан атыыга таһаарыахпыт», — диэн этэр фермер Александр Фомин.