Амма улууһун урбаанньыттара өрөспүүбүлүкэҕэ балаҕан ыйын 23-27 күннэригэр ыытыллар Форумҥа кыттыыны ылыахтара. Бу туһунан “Мин биисинэһим” киин дириэктэрэ Владимир Колосовтыын кэпсэтэбит.
-Владимир Владимирович, бүгүҥҥэттэн саҕаламмыт урбаанньыттар Форумнарыгар улууспут хайдах кыттар? -Өрөспүүбүлүкэбитигэр балаҕан ыйын төрдүс өрөбүл күнэ Урбаанньыттар күннэринэн биллэриллэн ? сылын бэлиэтэнэр. Бу күнү көрсө урбаанньыттарга анаан “Бизнес – дело семейное” диэн дьыалабый былаһаакка тэриллэн Форум ыытыллар. Бу былаһаакка сарсын, балаҕан ыйын 24 күнүгэр Орто дойдуга “Өктөм” диэн туристическай комплекска буолуохтаах. Тэрээһиҥҥэ улууспутуттан үс дьиэ кэргэн кыттар. -Дьэ кимнээхтэрий? — Араас салааттан кыттыахтара. Дьиҥинэн улууска дьиэ кэргэнинэн биисинэстэрин тэрийэр дьон элбэхтэр. Ол гынан баран күһүн күн-дьыл былдьаһыга буолан үгүстэр кыайан кыттыбатылар. Ол да буоллар син биир улууһу көрдөрөр бастыҥ дьоннор кыттыахтара. Бары Амма нэһилиэгиттэн бараллар. Бастатан туран Майя Маевна уонна Георгий Афанасьевич Олесовтар. Бу эдэр дьон Амма нэһилиэгэр “Бэрт” диэн нэһилиэнньэ сөбүлээн сылдьар араас наадалаах табаары атыылыыр маҕаһыыннаахтар. Ону таһынан ыал аҕа баһылыга Георгий тимиринэн уһанар. Кини бэйэтэ Уус Адан улууһун уустарыттан төрүттээх. Саха быһаҕын, анньыылары, ону сэргэ хомуһу оҥорорго ылсан эрэр. Элбэх быыстапкаларга кыттыбыта. Талааннаах эдэр киһи.
Иккис дьиэ кэргэммит бары билэр “Ыллык” бааһынай хаһаайыстыбабыт салайааччыта Мария Егоровна Иванова уолунаан Александрдыын кыттыахтара. Биллэрин курдук, кинилэр улуус киинигэр хаһаайыстыба тутан үлэлээбиттэрэ хаһыс да сыллара буолла. Бу хаһаайыстыба сүөһүтүн сэргэ, племенной коза боруодаларын аҕалан иитэн эрэр. Мария Егоровна инники сайдыытыгар туспа көрүүлэрдээх.
Онтон үһүс дьиэ кэргэнинэн эдэр дьон Анна Борисовна уонна Максим Дмитриевич Спиридоновтар буолаллар. Бу ыал шиномонтажтаахтар. Манна кинилэр көлүөһэлэри уларыталлар, кондиционер да заправкалыыллар. Ону сэргэ ыал ийэтэ быйыл сайын Короленко хайатыгар сир ылан туризмынан дьарыктанан саҕалаата.
-Форумҥа ханнык тэрээһиннэр буолуохтарай? -Бу олус бэртээхэй тэрээһини өрөспүүбүлүкэ урбааҥҥа уонна туризмҥа министиэристибэтэ тэрийэн ыытар. Орто дойдуга анаан-минээн автобуһунан илдьэллэр-аҕалаллар. Онно араас дьыалабыай көрсүһүүлэр, трениннэр, семинардар буолуохтара. “Пути развития семейного бизнеса” диэн төгүрүк остуолга кыттыахтара. Бу кытта барар дьоммут “Лучшее семейное предприятие Якутии- 2021 ” диэн күрэххэ киирсиэхтэрэ. Биллэн туран аҥардас күрэхтэһэ эрэ буолбакка, атын дьону кытта билсиһэн, бэйэлэрин көрдөрөн, атыттары кытта кэпсэтэн-билсэн сайдан кэлиэхтэрэ диэн эрэнэбит. Маны сэргэ бүгүн күнүс 14 чаастан биһиги мантан онлайн форматынан улуус тэрилтэлэрэ кыттыылаах «төгүрүк остуол» оҥоруохпут. Онно бары көхтөөх кыттыыны ыларгытыгар ыҥырабыт. -Владимир Владимирович, эппиэттэрин иһин махтал. Улууспутуттан Фрумҥа кыттар дьиэ кэргэттэргэ ситиһиилэри баҕарабыт. Ону сэргэ бүгүн ыытыллар “төгүрүк остуол” түмүктэрдээх, этиилэрдээх буоллун.