«Амма» ТХПК соҕотуопкалыыр, астыыр-үөллүүр киинин маҕаһыыннарыгар нэһилиэнньэ сөбүлээн сылдьар. Баар кыһалҕалары аахсыбакка тэрилтэ ситиһиилээхтик үлэлиир.

Кэпэрэтиип бородууксуйалара Амма улууһун киинигэр «Эт-үүт» уонна «Сулус» маҕаһыыҥҥа итиэннэ биирдиилээн чааһынай маҕаһыыннарга атыыланаллар.  Манна эт, үүт аһылыктар, барыанньаттан оҥоһуллубут бородууксуйа, ыраас «Амма уута» онтон да атын бэйэ аһылыга дэлэйдик атыыланар. Бу тэрилтэни 2015 сылтан дириэктэр Айысен Черноградскай салайар. Ааспыт сылга үүккэ 5750 туонна, эккэ 120 туонна былааннаах үлэлээтэ. Бүгүҥҥү күҥҥэ 64 учредителлээх. Төһө да үлэлиир балаһыанньа сыллата ыараан истэр, кэлэктиип баар кыһалҕалары аахсыбакка бары күүһүн ууран үлэлиир, ситиһиилэр да кэлэ тураллар. Күһүҥҥү ас – үөл  өрөспүүбүлүкэтээҕи дьаарбаҥкатыгар Амма сыыра үһүс, отон бородууксуйата бастакы миэстэлэри ылбыттара. Оттон Москубаҕа буолбут «Көмүс күһүн» Бүтүн Арассыыйатааҕы агропромышленнай быыстапкаҕа Амма сыыра уонна арыыта кыһыл көмүс мэтээлинэн бэлиэтэммиттэрэ. Бу сылга Болугурга биир симиэнэҕэ 5 туоннаҕа суоттаммыт собуот тутуллар буолбута эмиэ биир кыайыы буолар. Сахабыт сирин тымныыта, нолуокка улахан кээмэйдээх эбии төлөбүрдэр киириилэрэ, уматык, уот төлөбүрдэрин сыаналара үрдүү тураллара үлэҕэ охсуута улахан. Бородууксуйаны батарыы, атыы – эргиэн барыыта эмиэ туспа боппуруос. Бу сылга өрөспүүбүлүкэ бүддьүөтүттэн эккэ субсидия көрүллүбэтэ. Дьон аҕыйах эти туттарда, төлөбүрэ ыараата. Дьиэ – уот эргэриитэ, дьон үлэлиир усулуобуйата уустугуруута эмиэ баар суол.

«Ил Дархан Айсен Николаев ахсынньы ыйдааҕы этиитигэр үүт сыанатын үрдэтэр туһунан бэлиэтээбитэ нэһилиэнньэни үөрдүбүт буолуохтаах. Харчы сүөһү төбөтүнэн буолбакка үүт сыаната үрдүүрүгэр көрүллэрэ сөптөөх. Сүөһү төбөтүнэн биэрдэххэ, үүт туттарыытын былаана кыччыыр. Биһиги дьоммут – сэргэбит үлэлээх – хамнастаах уонна астаах – үөлээх буолуохтаахтар диэн сыаллаах үлэлиибит. Бородууксуйабыт эт, үүт аһылык кыһыннары – сайыннары маҕаһыыннарбытыгар быстыбакка тахса турар. Бэйэбит дьоммутун аһынан – үөлүнэн толору хааччыйабыт, ол кэннэ атын улуустары кытта эмиэ үлэлэһэбит. Нерюнгри, Дьокуускай куораттарга, Уус-Маайа улууһугар нэһилиэнньэ биһиги аспытын – үөлбүтүн хамаҕатык ылар. Онон тирэх хаһаайыстыбаларбыт, үлэлиэн баҕалаах дьоммут, хамаандабыт баар», – диэн этэр дириэктэр Айысен Черноградскай.

Источник: Ulus.media