Покровка нэһилиэгэр Петровтар дьиэ кэргэн бу сылга нэһилиэктэн көстөн турар Татаарка үрэҕин сиригэр Амма өрүс үрдүгэр бэйэлэрин күүстэринэн саҥа сайылык туттан көстүлэр. Манна титиик, күрүө-хаһаа, олорор дьиэ баар буолла.
Санатар буоллахха, ыал аҕа баһылыга Игорь Петрович 2019 сыллаахха «Агростартап» федеральнай программанан ынах сүөһүнэн бааһынай хаһаайыстыба салайааччыта буолан дэриэбинэ таһыгар 50 төбөҕө анаммыт хотону туттубута, бургунастары, тыраахтары атыыласпыта. Аны сайылык туһунан уруккуттан баар толкуйун олоххо киллэрэн, айылҕа маанылаах кэрэ миэстэтигэр көһөн кэлэн үөрүүтэ улахан. Өрөспүүбүлүкэҕэ бурдугу үүннэриинэн биллэр нэһилиэккэ сайылык диэн суоҕун кэриэтэ, онон бу бастакы сайылык холобура диэххэ сөп. Мантан салгыы уларсыбыт сэттэ гектардаах сиригэр агротуризмы сайыннарар былааннаах. Сайын кэлбит ыалдьыттар тыа дьоно хайдах олороллорун, үлэлииллэрин – хамсыылларын, бэйэ аһа хайдах оҥоһуллан тахсарын билсэн, ынах ыан, сибиинньэни, козаны аһатан, атын да кыыллары, көтөрдөрү көрөн сэҥээрэн баралларыгар туһаайан киэҥ хабааннаах үлэни ыытар баҕалаах. Саҥа сайылыкка сүөһү көрүүтүн түбүгүн таһынан тутуу үлэтэ күн аайы салгыы ыытыллар. Уот ситимэ суоҕунан үлэҕэ-хамнаска генераторы туһаналлар. Ол эрээри фермер кэргэнэ Александра Николаевналыын 33 ынахтарын күҥҥэ иккитэ илиинэн ыыллар. Хаһаайын этэринэн, үүт эбиллэринэн уонна хаачыстыбата да тупсарынан илиинэн ыыр ырааҕынан ордук. Оттон хаһаайыстыба бары үлэтигэр тырахтарыыс Михаил Никифоров көмөтө улахан.
«Саха былыргы үгэһинэн сайылык туттар баҕа санаабын толорон көһөн кэлбиппит нэдиэлэ буолла. Манна чуумпу, кэрэ айылҕалаах сир киһи үлэлииригэр да, сынньанарыгар да табыгастаах. Биһиги дохуоппут — үүт. Ааспыт сайыны кытта тэҥнээн көрдөххө, ынахтар үүттэрэ сайылыкка кэлэннэр биллэ эбилиннэ. Билигин күҥҥэ 250 лиитэрэни ыы сылдьабыт, инникитин 300 лиитэрэни ыахпыт дии саныыбын. Саха сирин киинигэр олорор буоламмыт атын улуустартан сайыммыт икки нэдиэлэнэн уһунунан, кэрэ айылҕалаахпытынан Аммаҕа туризм сайдарыгар усулуобуйа баар. Судаарыстыбаннай Дума сокуонун барылынан бааһынай хаһаайыстыба учаастагар олорор дьиэни туттар көҥүллэнэн сайдарга кыах бэрилиннэ. Соторутааҕыта нэһилиэкпитигэр бырабыыталыстыба бэрэссэдээтэлэ кэлэ сылдьан улууспутугар тугунан дьарыктаныахха сөбүн туһунан кэпсэтиигэ тыа хаһаайыстыбата уонна туризм сайдара саамай сөптөөҕүн бэлиэтээбитэ. Үп-харчы өттүнэн уустук да буоллар, бу хайысхаҕа кыах тиийэринэн үлэлии сылдьабыт, баҕа санаа да баһаам. Бырайыакпын «Русское поле» диэн ааттыаҕым. Тоҕо диэтэххэ, нууччалыы тыллаах нэһилиэнньэлээх Покровкабыт киэҥ нэлэмэн хочолорунан биллэр. Маршруппутугар сайылыгы, сөтүөнү таһынан сир аһыгар, өрүс уҥуор баар мүөттээх ыҥырыалар уйаларыгар сырыы баар буолуоҕа. Кыралаан кыраайы үөрэтиини киллэриэхпин саныыбын. Агротуризмы бу сайынтан саҕалаан үлэлэтэр былааннаахпыт. Атын дьон атын сиргэ хайдах үлэлииллэрин көрөр, үөрэнэр эмиэ баҕалаахпын», — диэн санаатын үллэстэр фермер Игорь Петров.
