Амма нэһилиэгин фермердэрэ Харитоновтар дьиэ кэргэн быйыл өлгөм үүнүүнү хомуйдулар, аны күөх сайынтан ылбыт бородууксуйаларын батаран түмүктээн эрэллэр.
Амма нэһилиэгэр оҕуруот аһын үүннэриитинэн дьарыктанар бааһынай хаһаайыстыбалаах ыаллар Марфа, Василий Харитоновтар «Слава», «Ранняя» уонна «Золотой гектар» диэн суортарын ыһан барыта 16 т. хаппыыстаны, 6 т. хортуоппуйу, 2,5 т. сүбүөкүлэни, 2 тю моркуобу хомуйдулар. Аны батарыы боппуруоһа быһаарыллан түмүктэнэн эрэр. Билигин хаппыыста уонна аҕыйах сүбүөкүлэ хаалла. Үлэһит ыал сыл аайы хаппыысталарын, сүбүөкүлэлэрин урбаанньыттар Людмила Куприянова, Григорий Аммосов бородуукта маҕаһыыннарыгар, «Автозапчасти» маҕаһыыны кытта кэпсэтиинэн туттараллар. Быйыл оҕуруот астарын Абаҕа, Чапчылҕан уонна биирдиилээн ас астыыр урбаанньыттар хото ыллылар. Туспа хаһаайыстыба буолан тэриллиэхтэриттэн сопхуостарын «Бурдук» биригээдэтин үлэһиттэрин, биэнсийэҕэ олорор дьоннорун хаппыыстанан хааччыйаллар уонна Амма нэһилиэгин дьаһалтатын кытта аҕа саастаах дьоннорун хааччыйар кэпсэтиилээхтэр.
«Быйыл биһиэхэ бэрт сайын буолан ааста, үүнүүбүт үчүгэй. От ыйын бүтүүтэ уонна атырдьах ыйын саҥатыгар курааннаатар даҕаны ууну ыстарар тэриллээх буоламмыт курааҥҥа мэһэйдэппэтибит. Түгэнинэн туһанан сыл аайы бу тэрилбитин өрөмүөннүүр, ону тэҥэ биир бааһынабытыгар маннык тэрили таҥан, сыбааркалаан биэрбит Петр Николаевич Кириллиҥҥэ махталбыт муҥура суох. Аһаҕас халлаан анныгар өссө кабачок, оҕурсу үчүгэйдик үүннэ. Бааһынабыт буорун Дьокуускай куорат лабораториятыгар туттарабыт, бородууксуйабытын хомуйан баран атыылыахпыт иннинэ нитракка анаалыс туттаран хайаан да бэрэбиэркэлэтэбит. Онон оҕуруоппут аһа бары нуормаҕа, ирдэбилгэ эппиэттиир. Сыл аайы дьиэ кэргэн, аймах бары мустан субуотунньуктуубут. Урукку сыллартан билэр дьоммут ыҥыртарыыта суох, сорохтор эрдэттэн үлэһэн кэлэн көмө буолаллар уонна туохха наадыйалларынан оҕуруот аһын ылаллар. Эһиил хортуоппуйбутун бэйэбитигэр эрэ суоттанан ыһыахпыт. Биирдиилээн тэрилтэлэр, оскуолалар, оҕо садтара, ыаллар даҕаны учаастакпытыгар киирэн хаппыыста олордоллоругар баҕарабыт. Холобур, быйыл Алексеевтар дьиэ кэргэн экономикатын сылынан бэйэлэрэ 100 устуука хаппыыстаны олордоннор хомуйдулар. Ыал экономикатын сылынан сирбитин оҥорон биэрбиппитигэр улууспут уонча ыала кэлэннэр хортуоппуй олордубуттара. Эрдэттэн былааннаан олордобут диэтэхтэринэ кэпсэтиинэн сирдэрин оҥорон, арассаадаларын үүннэрэн биэриэх этибит», — диэн этэр уопуттаах оҕуруотчут Марфа Алексеевна.