Амма нэһилиэгин тэрилтэлэрэ бильярдка күрэхтэстилэр. Уопуттаах оонньооччулар хамаандалара инники күөҥҥэ таҕыстылар.
Амма нэһилиэгэр холбоһуктаах тэрилтэлэр икки ардыларыгар сыл устата ыытыллар спартакиада иитинэн бильярдка күрэхтэһиигэ 11 хамаанда кытынна.
Түмүккэ Григорий Аммосов, Григорий Кириллин, Афанасий Нестеров оонньооччулаах урбаанньыттар хамаандалара кыайыылааҕынан таҕыста. Иккиһи ОДьКХ хамаандатыттан Алексей Пахомов, Евсей Никифоров, Петр Гермогенов, үсүһү ойуур хаһаайыстыбатын хамаандатын кыттыылаахтара Николай Иванов, Василий Кириллин, Петр Борисов ыллылар.
Алексей Пахомов, ОДьКХ оонньооччута: «Өнньүөскэ оҕо эрдэхпиттэн бильярдка оонньоон улааппытым. Убайым Прокопий Александрович дьиэтигэр бильярд остуоллаах этэ. Онтон арыый улаатан баран кулууппутугар оонньуур буолбутум. Билигин биир хамаандаҕа оонньуу сылдьар аҕа табаарыһым Петр Гермогеновтыын дойдубутугар бииргэ оонньуур этибит. Аммаҕа тэрилтэлэр икки ардыларыгар ыытыллыбыт маҥнайгы күрэхтэһиигэ үһүс буолбуппут. Быйыл илин эҥэр күрэхтэһиитигэр иккис миэстэҕэ таҕыстым, өрөспүүбүлүкэтээҕи күрэхтэһиигэ эмиэ холонон көрдүм. «Фаворит» кулуупка оонньуурга бэртээхэй усулуобуйа баар, биирдиилээн тэрилтэлэргэ бильярд остуолларын эмиэ туруортаан эрэллэр, онон оонньооччулар элбээн, сайдан иһиэхтэрэ диэн санаалаахпын».
Игнатий Гаврильев, ИДьО оонньооччута: «Бу күрэхтэһии маҥнай ыытылларыгар кэнники соҕус миэстэҕэ тиксибиппит, быйыл арыый иннин диэки таҕыстыбыт. Хамаандабытыгар Валентин Барашков, Дмитрий Костромин буолан кытынныбыт. Урут тэрилтэбитигэр иллэҥ кэммитигэр кыралаан оонньуур этибит. Ол эрээри күрэхтэһиилэр буолбаттар этэ. Соторутааҕыта түөлбэлэр икки ардыларыгар буолбут күрэхтэһиигэ кыттыбытым. Миэстэҕэ тиксибит оонньооччулар үксүлэрэ дьарыктанар дьон буолаллар. Ойуур хаһаайыстыбатын хамаандата эдэр дьонтон састааптаах.
Ити курдук эдэрдэр эмиэ дьарыктанан иһэллэрэ наада».
Ааптар: Алтана Артемьева
Подробнее: ulus.media