Сомоҕолоһуу күнүн көрсө улуус биир кытыы сытар нэһилиэгэр Амма Наахараҕа бэйэ дьарыктаах буолуутугар судаарыстыбаттан бэриллэр көмөнү таба туһанан нэһилиэнньэҕэ олус наадалаах парикмахерскай өҥөтө баар буолла.
Амма Наахара нэһилиэгэр бэйэ дьыалатын тиһиктээхтик ылсан, хорсун санааланан «Chik Hair» диэн баттах оҥорор салон үөрүүлээх аһыллыыта буолла. Салону тапталлаах кэргэн, истиҥ ийэ, нэһилиэкпит ыччата, эдэркээн киһи Айыына Михайлова арыйан үлэтин саҕалаата. Айыына бастаан бэйэтэ баттах оҥорорго аналлаах араас курстарга үөрэммит. Ол кэнниттэн Амматааҕы нэһилиэнньэ социальнай көмүскэлин биир кэлим киинин нөҥүө бэйэ дьарыктаах буолуутугар бэриллэр көмөтүн киирсэн, биисинэс былаан оҥостон, социальнай хантыраак нөҥүө дьоһун өйөбүл ылан, ону сөптөөхтүк туттан «Chik Hair» диэн баттах оҥорор салонун арыйда.
Салон арыллар үөрүүлээх чааһыгар дьиэ кэргэн ийэлэрэ, эбэлэрэ Кюннэй Егоровна Михайлова алгыстаан арчылаата. Бэйэлэрин эҕэрдэлэрин «Амма Наахара нэһилиэгэ» тыа сирин түөлбэтин баһылыга Захар Александров, баһылык солбуйааччыта Сахаяна Михайлова уонна Айыына чугас дьоно тириэртилэр.
Бу үөрүүлээх түгэни Светлана Захарова салайааччылаах «Түмэн» сынньалаҥ киинин кэлэктиибэ иилээн-саҕалаан ыыттылар. Баттах оҥорор салон боруогун атыллыыр кыһыл лиэнтэни хаһаайка Айыына Михайлова, өрүү өйөбүл буолар кэргэнэ Эдуард Михайлов уонна нэһилиэк аҕа баһылыга Захар Александров быстылар.
Хаһаайыннар кэлбит ыалдьыттары минньигэс астаах фуршетынан күндүлээтилэр. Айыынаҕа ылыммыт былааннарыҥ барыта олоххо киирэн истиннэр, аан айылгы анаан-минээн биэрбит дьоҕура, олоххо дьулууруҥ, уҕараабат эрчимиҥ өссө кэҥээн, улаатан иһэригэр баҕарабыт.