Дьокуускайдааҕы тыа хаһаайыстыбатын техникумун тэрийиитинэн Амма улууһугар саҥа саҕалааччы фермердэргэ үөрэх ыытылынна.
Семинарга тыа хаһаайыстыбатын министиэристибэтин агропромышленнай комплексын ресурснай хааччыйыыга экономиһа Н.М. Скрябина, тыа хаһаайыстыбатын техникумун преподавателэ Р.А. Сметанина кэлэннэр хаһаайыстыбаларын саҥа тэринээччилэргэ, салгыы сайдар санаалаах фермердэргэ, уопсайа 15 киһиэхэ олус туһалаах үөрэҕи ыыттылар, Граннар конкурстарыгар кыттарга бизнес-былааны хайдах суруйарга наадалаах сүбэлэри биэрдилэр, методическай көмөлөрү тарҕаттылар, элбэх боппуруостарга эппиэттээтилэр.
Маны таһынан улуус тэрилтэлэрин туһааннаах исписэлиистэригэр сир боппуруостарыгар, бэйэ дьыалатын тэриниигэ, отчуоттары толорууга, улууска сүөһүнү иитиини сайыннарыыга ханнык сөптөөх хайысханы тутуһарга, үлэҕэ харыстабыллаах буолууга иһитиннэриилэри оҥордулар, ыйытыыларга эппиэттээтилэр. Семинар кыттыылаахтара туһалаах семинартан элбэх туһалааҕы билэн, астынан бардылар уонна инникитин маннык үөрэхтэр тиһигин быспакка ыытылла туралларыгар баҕардылар.