«Чэйбитин бэлэмнээһиҥҥэ норуот ньыматынан отунан анаан дьарыктанан кэлбит Амматтан Елена Петровна Васильева – Эбээ Өлөөнө уонна Болугуртан Мария Евсеевна Петрова сүбэлэрин туһанан, кинилэри кытта ыкса үлэлэһэн кэллибит.
Кучу оту сибэккитэ тыллыан иннинэ, сибэккитэ тыллыбытын кэннэ уонна күһүн балаҕан ыйыгар айылҕа бэйэтэ бэлэмнээбитинэн Туйаара Григорьева — Кучу Туйаара технологиятынан хомуйан оҥоробут. Бу күҥҥэ диэри чэйбитигэр эбилик буолар бэс туорааҕын куоппаһын, хатыҥ сэбирдэҕин, тиит, бэс иннэлэрин, боруу оту, дөлүһүөн сибэккитин хомуйдубут. Аны үөрэ отун хомуйууга тахсыахпыт. Моонньоҕон, дьэдьэн сэбирдэхтэрэ, биэс тымырдаах от, хатарыллыбыт дөлүһүөн чэй амтанын тупсаран биэрэллэр.
Араас быыстапкаларга кыттабыт, бородууксуйабыт куруук биһирэнэр. Дизайнердар көмөлөрүнэн чэйбитин сиэдэрэй көстүүлээх хааларга уган нэһилиэнньэҕэ таһаарабыт, тута бүтэн иһэр. Атын улуус дьонугар бэлэххэ диэн анаан ылааччы элбэх. Атын саҥа суоллары эмиэ көрдүүбүт. Чэйбит химическэй састаабын үөрэтиигэ, научнай өттүттэн көрүүгэ исписэлиистэри, учуонайдары кытта үлэни ыыта сылдьабыт. Бэйэбит олохтоох бородууксуйабытыгар сэртэпикээт ылыытыгар эмиэ үлэлэһиэхпит», — диэн санаатын үллэстэр «Амма чэйэ» бырайыак ааптара, производственнай үөрэхтээһин маастара Александра Киренская.
Алтана Артемьева