Урбаанньыт Майя Олесова Амма өҥ буоругар үүммүт сэлиэһинэйтэн лэппиэскэ астаан саҕалаабыта иккис сылыгар барда. Бу күннэргэ кини нэһилиэнньэҕэ маастар-кылаастары ыытан интэриэһиргээбит дьон сылдьан лэппиэскэ амсайар кыахтаннылар.
“Амма сэлиэһинэйиттэн лэппиэскэни, алаадьыны астаан саҕалаабытым иккис сылыгар барда. Элбэх киһи лэппиэскэбитин амсайан баран, хайдах маннык оҥороҕут диэн ыйытааччы. Онон дьоҥҥо-сэргэҕэ билиһиннэриэххэ диэн санааттан маастар-кылаастары бэйэбит банкетнай саалабытыгар оҥорон эрэбин. Дьон интэриэһиргээн сырытта. Манна өссө мин Амма чэйинэн дьарыктанар Александра Киренскаяны кытта маастары-кылаастарбытын холбуубут. Александра Николаевна хайдах чэйи сөптөөхтүк оҥорор туһунан билиһиннэрэр.
Онтон мин Амма бурдугуттан лэппиэскэни хайдах астыыры көрдөрөн, онно буһан тахсыбыт лэппиэскэни, чэйи кытта амсайабыт. Лэппиэскэ рецебин кыратык кэпсиир буоллахха, сүрүннээн суоракка оҥоробут. Манна “Амма” СППК суоратын туһанабыт. Суоракка туус, чаайнай луоска сода кутабыт. Онтон дьэ сэлиэһинэйтэн мэлиллибит бурдугу кутан мэһийэбит. Тиэстэни бэйэн көрөн мэһийэҕин. Кытаанах да, сымнаҕас да буолуон сөп. Бу кэнниттэн төгүрүк гына быһыылаан духовкаҕа 180 кыраадыска буһара уурабыт. Лэппиэскэбитин оҥорорбутугар сэлиэһинэйи туох булкадыһыга суох туттабыт. Сорох дьон атын маҕаһыынтан ылбыт бурдуктарын булкуйааччылар. Манна өссө бэйэбит доруоһата суох суоратынан аһатыы оҥорон туттабыт”, — диэн Майя Олесова санаатын үллэһиннэ.
Быйыл сэлиэһинэй үүнүүтэ үчүгэй. Онон Строд аатынан хаһаайыстыбаны кытта кэпсэтэн, 40 туоннаны ыларга дуогабардаспыттар. Амма сэлиэһинэйин бурдугун сакааһынан атыылыыллар.