Икки күннээх «Продовольствие-2022» атыы-кутуу дьаарбаҥката түмүктэннэ. Тыа хаһаайыстыбатын үлэһиттэрин сыллааҕы сыраларын сыаналыыр тэрээһиҥҥэ Амма дэлэгээссийэтэ өрүү ох курдук оҥостон киирэн кыттар. Бу да сырыыга дьоммут ситиһиилээхтик кыттаннар өттүк харалаах, илии тутуурдаах кэлэн иһэллэр.
Ол курдук, мүөт быыстапкатыгар урбаанньыттар Тимофей Дмитриевич Григорьев II истиэпэннээх, Эльвира Васильевна Пестерева III истиэпэннээх дьупулуому туттулар. Агрооскуолалары көрүү-быыстапкаҕа Бөтүҥ оскуолата III истиэпэннээх дьупулуомҥа тигистэ. «Амма» ТХППК морса бастыҥ утаҕынан ааттанан сураҕа соноон, аата аатыран I истиэпэннээх дьупулуому ыллылар. Талба атыыр сылгылары сыныйан сыаналааһын түмүгэр Сатаҕайтан Лукин аатынан хаһаайыстыба Арбай атыыра III, Абаҕаттан Строд аатынан хаһаайыстыба Тимофеев Сура атыыра I истиэпэннээх дьупулуомнарынан наҕараадаланнылар.
Улуус бааһынайдарын Ассоциациятын бэрэссэдээтэлэ Александра Цыпандина этэринэн, Амма аһа, мэлдьи буоларын курдук, атыыга хамаҕатык барбыт. Ордук арыыны, сыыры, мүөтү олоччу ылан бүтэрбиттэр.