Амма улууһун хаһаайыстыбалара кыстыктара хайдах туох туруктааҕын билсэ СӨ тыатын хаһаайыстыбатын миниистирэ Александр Атласов кэлэн барда. Бэйэ аһын дэлэтээччилэр миниистиргэ бэйэлэрин “ыалдьар” боппуруостарын туруордулар.
“Миниистир улууспутугар кыстык туругун билсэ тэрээһиннээх уонна бааһынай хаһаайыстыбаларга сырытта. Ол курдук Чапчылҕаҥҥа, Бөтүҥҥэ, Абаҕаҕа, Соморсуҥҥа, Сэргэ Бэскэ сырытта. Сэргэ Бэскэ Фоминнарга оҕуруот аһын харайар ыскылааты көрүөхтээх.
Уопсайынан быйылгы кыстык олус чэпчэкитэ суох. Ордук Бүлүү бөлөхтөргө, Кэбээйи улууһугар балаһыанньа уустук. Онтон биһиги улууспут окко былаанын 97 бырыһыан толорбута. Ону сэргэ бэйэбит сиэмэбитинэн ыспыт бурдукпутун син ылан, кыстыкка этэҥҥэ үктэннибит диэххэ наада. Миниистир Александр Павловичтан хаһаайыстыба салайааччылара кэлэр сыл бюджетэ хайдах буоларын, техника, саҥа хотон, онтон да атын кыһалҕалаах боппуруостарын туруорустулар. Холобура абаҕалар бурдук ыскылаатын тутар баҕа санаалаахтар. Тоҕо диэтэр урут сэбиэскэй кэмтэн ыла турар ыскылааттар эргэрэн, сиэмэни кыайан уурбат туруктаахтар. Маны тэҥэ кэлэр сылга туох былааннар, сүүрээннэр баалларын, инникитин үчүгэй бырагыраамалар салгыы үлэлиэхтэрин наада диэн санааларын тириэртилэр”, — диэн улуус тыатын хаһаайыстыбатын управлениетын салайааччыта Ион Кононов сырдатта.
Миниистир Аммаҕа кэлээт управлениеҕа сүбэ мунньаҕы ыытан баран, Чапчылҕаҥҥа Оруджали Гардашовка, Бөтүҥҥэ “Бөтүҥ” ТХПК-ҕа, Абаҕаҕа Строд аатынан хаһаайыстыбаҕа, салгыы Соморсуҥҥа, Сэргэ Бэскэ сырытта. Бөтүҥҥэ Александр Павловыһы аатырбыт ыанньыксыт, Герой Ийэ Аграфена Егоровна Сутакова көрсөн истиҥник кэпсэттилэр. Хайа да хаһаайыстыбаҕа сырыттар сүрүн туруорсуллар боппуруоһунан үлэһит илии тиийбэтэ уонна сыана барыта үрдүү турар кэмигэр, көрүллэр үбү өссө эбэр туһунан туруорустулар. Маны сэргэ “Кормопроизводство” уонна финансовай чэбдигирдии бырагыраамалар салгыы үлэлииллэрэ наадатын эттилэр. Миниистир сылдьыбыт сиригэр салайааччылары кытта бэркэ иҥэн-тоҥон кыстыгы туоруур саппаас астарын хайдах хаһааммыттарын, сүөһүлэрин ахсаанын ыйыталаста.
“Александр Павлович бэлиэтээбитинэн бырагыраамалар салгыы үлэлииллэригэр үлэ барар. Финансовай чэбдигирдии бырагыраамата бюджеккэ киирбэтэр да, туруорсуу барар. Маны сэргэ кини кэлэр сылга эмиэ бэйэ сиэмэтинэн хааччыныыны ыйыталаста. Маныаха быйыл кураан буолан кэлэр сылга 200 тоннаны тастан атыылаһарбыт буолуо. Тоҕо диэтэр наадыйар сиэмэбит 800 тонна эбит буоллаҕына, бэйэбит сиэмэбит 600 тонна ”, — диэн көрсүһүү түмүктэрин Ион Семенович билиһиннэрэр.
Сиһилии сырыы туһунан “Амма олоҕо” хаһыат кэлэр нүөмэригэр сырдатыахпыт. Хаһыаккытын сурутуҥ, ааҕыҥ!