Аммаҕа Арассыыйаҕа урбаанньыт күнүнэн идэлээх дьон эдэр туристар ыстаансыйаларын базаларыгар улуустааҕы сүлүөккэ муһуннулар. Үөрүүлээх тэрээһин алгыһынан саҕаланна. Быйылгы сылга уратытык ыытыллыбыт бэлиэ күҥҥэ улуус баһылыгын бастакы солбуйааччы Василий Бураев, «Биисинэс инкубатор» салайааччыта Евгений Афанасьев, «Мин биисинэһим» киин салайааччыта Владимир Колосов, атыы-эргиэн кииннэрин, бааһынай хаһаайыстыбалар салайааччылара, биирдиилээн дьон эҕэрдэлэрин эттилэр. Бастыҥ урбаанньыттар наҕараадалары туттулар.
Аммаҕа ыытыллыбыт сүлүөккэ улууспутугар урбаан эйгэтин үлэһиттэрэ мустан бэлиэ күннэрин ыллылар. Күн устата турист рекреационнай кластерын бредбугун сүрэхтэниитэ, «МИК» волонтер корпуһун түмсүүтэ бэйэтин билиһиннэриитэ,
уоннуу киһилээх үс сүүмэрдэммит хамаанда сэттэ түһүмэхтээх араас көрүҥнээх күрэхтэһиилэргэ көхтөөх кыттыылара, үҥкүү-битии болҕомтону тартылар. Ыытааччы Николай Нестерев тэрээһини олус сэргэхтик ыытта. Урбаан эйгэтигэр айымньылаахтык үлэлии-хамсыы, айа-тута сылдьар үлэһиттэр, өрүү спонсор быһыытынан дьоҥҥо-сэргэҕэ көмө буолааччылар сыралаах үлэлэрэ сыаналанан, чиэстэнэн өрөспүүбүлүкэ, улуус, нэһилиэк наҕараадаларын тутан, биисинэстэрэ сайдан иһэриттэн үөрүүлэрэ муҥура суох буолла.
Кэлбит дьон таһаарыылаах, үтүө түмүктээх күнтэн астынан, дуоһуйан, сынньанан бардылар. Түмүккэ тэрийээччилэргэ, координационнай сүбэҕэ, биисинэс инкубатор, «Мин биисэнэһим» киин салайааччыларыгар барҕа махталларын биллэрдилэр.
«Эрдэ Аммаҕа ыытыллыбыт туристическай кластерга аналлаах брендбук күрэһэ ыытыллыбыта. Манна үс үлэ киирбититтэн биисинэс инкубатор резиденэ, урбаанньыт Владислав Шестаков ааптардаах уонна Юлия Голикова кыттыгас ааптар үлэ кыайыылааҕынан тахсаннар холбоон 100 тыһыынча солкуобай харчынан бириэмийэни туттулар. Амма урбаанньыттарын логотибын көрүүтүгэр ыҥырыылаах ыалдьыт, улуус тутаах архитектора Федора Алексеева дьүүллүүр сүбэ буолан кыайыылаахтары быһаарда, онон бу бэлиэ өссө тупсарыллан урбаанньыттар бары инники туттар эмблемабыт буолуо диэн эрэнэбит. «МИК» араас тэрилтэлэртэн хомуллан тэриллибит түмсүү ыччаты волонтер хамсааһыныгар киллэриигэ, үөрэтиигэ, патриоттуу иитиигэ, араас тэрээһиннэргэ көмөлөһөр сыаллаах. Бу түмсүү кыттыылаахтара урбаанньыттар өйөбүллэринэн мэдиссиинэҕэ көмөҕө, искусствоны, култуураны сайыннарыыга үлэлэһэр баҕалаахтарын эттилэр. Быйылгыттан саҕалаан бааһынай хаһаайыстыбалар бу тэрээһиҥҥэ эмиэ кыттаннар сомоҕолоһуу буолла.
Араас күрэхтэһиилэр барыбытын түмтүлэр. Биһиги хаһаайыстыбабыт тутаах үлэһитэ Василий Мухаметов ох саанан ытыыга бастакы миэстэ буолан олус үөрдүбүт, бириистэр да олус үчүгэйдэр. Бириистэр спонсордарыгар координационнай сэбиэт чилиэттэригэр, чуолаан, Людмила Еремеевна Куприяноваҕа, Иван Васильевич Заровняевка, эдэр урбаанньыттарга Ирина Николаевна Софроноваҕа, Майя Майевна Олесоваҕа махталбыт мунура суох. Тэрийээччилэр өссө даҕаны буолуохтаах кэлэр тэрээһиннэри бу курдук үрдүк таһымнаахтык ыытан урбаанньыттары үөрдүөхтэрэ, сынньатыахтара диэн бүк эрэнэбит», — диэн этэр «Мэҥкэр» бааһынай хаһаайыстыба салайааччыта Саргылана Рожина.