Новости
Аммаҕа сылгы собуота баар буолла
6 июля 2022

Василий Тимофеев бэрэссэдээтэллээх И.Я. Строд аатынан хаһаайыстыбатыгар племенной сылгы собуота буоларын туоһулуур сибидиэтэлистибэни Арассыыйа тыатын хаһаайыстыбатын министиэристибэтиттэн тутта. Бу Сахабыт сирин тыатын хаһаайыстыбата тэриллибитэ 100 сыллаах үбүлүөйүгэр улахан бэлиэ түгэнинэн буолла.

“Арассыыйа тыатын хаһаайыстыбатын министиэристибэтин 2022 сыл бэс ыйын 9 күнүнээҕи 353 №дээх бирикээһинэн И.Я Строд аатынан тыа хаһаайыстыбатын производственнай кооперативыгар саха сылгытын иитэр племенной собуот статуһа бэрилиннэ. Онон өрөспүүбүлүкэбит тэриллибитэ 100 сылын бэлиэтиир сылыгар бастакы племенной сылгы собуоттанна. Племенной собуот диэн тэрилтэ бастыҥ, үрдүк кылаастаах, төрдө-ууһа биллэр, төрөлкөй төрүөхтээх сылгылаах, ол сылгыта бэйэтин дьоҕурун, көрүҥүн удьуордаан оҕотугар биэрэр буолуохтаах. Ону таһынан бу тэрилтэ үрдүк көрдөрүүлээх, үөрэхтээх, билиилээх исписэлиистээх уонна бастыҥ сылгыһыттардаах буолара ирдэнэр. Тэрилтэ ыччат сылгытын үксүн племенной репродуктордарга атыылыахтаах. Онтон племенной репродуктор диэн тэрилтэ бастыҥ племенной сылгылартан ыччат сылгыны төрөтөн, эти оҥорон таһаарар тэрилтэлэргэ, биирдиилээн дьоҥҥо атыылаан, кинилэр сылгыларын тупсарыахтаах. Билэргит курдук Строд аатынан хаһаайыстыба урут уруккуттан, хаһаайыстыба буолан тэриллиэҕиттэн саха сылгытын иитиинэн утумнаахтык дьарыктанар. Онон кини баар базатыгар маннык племенной собуот статуһун ылбыта бэйэтэ ситимнээх, этэргэ диэри буолуохтааҕын курдук. Бу маннык собуот Саха сиригэр аан бастакы буолар. Бу статуһу ылыыга үлэ барбыта ыраатта”, — диэн кылаабынай зоотехник, бу үлэнэн дьарыктанар Николай Степанов сырдатта.

Источник