Амматааҕы Ф. Потапов аатынан норуот айымньытын дьиэтигэр Суоппар күнэ үөрүүлээхтик бэлиэтэннэ. Идэлээх күн урууллаах кэрэ аҥардар «Амма автоледи» түмсүүлэрэ тэриллибитэ 10 сыллаах үбүлүөйүн кытта дьүөрэлии тутуста. Бастыҥ суоппардар үрдүк наҕараадалары туттулар.
Суоппар күн өрөбүлэ суох айаҥҥа сылдьар биир уустук идэ буолар. Тимир көлөнү тэһииннээн, күннэтэ араас таһаҕаһы тиэрдэргэ сылдьар ыраах айан суоппардара үлэлэрэ өссө уустук буоллаҕа. Амматааҕы Ф. Потапов аатынан норуот айымньытын дьиэтигэр сүбэ күн суоппар идэлээх дьон түмсэн бэйэлэрин идэлээх бырааһынньыктарын бэлиэтээтилэр, уһун кэмҥэ идэлэригэр бэриниилээх дьон таһаарыылаах үлэлэрэ сыаналанна. Ону кытта сэргэ бу күн Амма улууһун тимир көлөнү доҕор оҥостубут кэрэ аҥардар кулууптара тэриллибитэ уон сылын эмиэ тэҥҥэ тутан бэлиэтээтилэр. Аммаҕа тимир көлөнү айааһаан, чугас доҕор оҥостубут кэрэ аҥардар кулууптара 2016 сыллаахха тэриллибитэ. Биир санаалаах дьон түмсэннэр, көхтөөхтүк үлэлээн барбыттара, өрөспүүбүлүкэҕэ тахсыбыттара. Салайааччынан, түмсүүнү тэрийэр көҕүлээччинэн урбаанньыт Наталия Шишигина буолбута. Быйыл Амма улууһугар ыытыллыбыт ыраах айан суоппардарын өрөспүүбүлүкэтээҕи сүлүөттэригэр аан бастакытын массыына ыытар дьахталлар кыттаннар, киэҥ сэҥээриини ылбыттара.
“Олус үчүгэй, улуус таһымнаах тэрээһин буолан ааста. Биһиги түмсүүбүт быйыл тэриллибитэ уон сыла. Онон бу төгүрүк датабытын Суоппар күнүгэр сөп түбэһиннэрэн, ыраах айан суоппардарын кытта тэҥҥэ ыллыбыт. Бэртээхэй бырааһынньык буолла. Тэрийбит дьоммутугар улаханнык махтанабыт. Наҕараада бөҕө ылан үөрүүбүт улахан. Биһиги түмсүүбүтүн уон сыл аннараа өртүгэр, өрөспүүбүлүкэ массыына ыытар дьахталларын кулуубуттан этии киирэн тэриллэн, ол сыл өрөспүүбүлүкэҕэ ыытыллыбыт тэрээһиҥҥэ кыттыбыппыт. Онтон ыла бу уон сыл устата үлэлээн кэллибит. Өссө тэриллиэхпит иннинэ массыыналаах кэрэ аҥардар түмсэн, автодесант оҥорон, нэһилиэктэргэ сылдьан араас тэрээһиннэри, көрсүһүүлэри ыыппыппыт. Быйыл ыраах айан суоппардара сыллата ыытар сүлүөттэрэ Аммаҕа ыытыллан. онно аан бастакытын автоледилар кыттан, атын улуустар бэркэ сэҥээрдилэр. Өссө 2024 сыллаахха улууспут ыраах айанын суоппардарын түмсүүтүн салайааччыта Николай Владимирович Акимов сүлүөт ыытылларын туһунан этэн, онно көмө буолуоххут дуо диэн этии киллэрбитэ. Онон биһиги дьоммутун өйөөн, кыттыыны ылбыппыт. Сүлүөт эстафетатын күрэҕэр биир түһүмэҕэр автоледи кыттыылаах этэ. Аны сахалыы таҥас күрэҕэр эмиэ кыттан, тэрийээччилэр астынан, ыһыахха кэлбит да дьон аммалар тэрээһиннэрин үрдүктүк сыаналаан барбыттара. Мин бу уон сыллаах үлэбин түмүктээн, этэргэ диэри, түмсүүнү салайар уруулу эдэр кыргыттарга биэрэбин. Бэйэм аттыларыгар сылдьан күүс-көмө буолуом. Уон сыллаах үбүлүөйбүтүн Суоппар күнүгэр ылыахпыт диэн эрдэ былааннаабыппыт. Бу дьоро күҥҥэ кэлэн эҕэрдэлээбит, үрдүк наҕараадалары туттарбыт, бырааһынньыгы тэрийбит дьоҥҥо, ыраах айан суоппардарын түмсүүтүгэр кулууппут аатыттан барҕа махтал тылларын аныыбыт. Биһиги уопсастыбаннай үлэбитин сыаналыыллар эбит диэн наһаа үөрдүбүт, астынныбыт”, – диэн Наталия Ивановна санаатын үллэһиннэ.
Идэлээх күнү уонна үбүлүөйдээх бэлиэ датаны бэлиэтиир дьоро күҥҥэ бэйэлэрин эҕэрдэлэрин улуус дьокутааттарын Сэбиэтин бэрэссэдээтэлэ Владимир Колосов, улуус баһылыгын тутууга солбуйааччы Виктор Смирников, Амма нэһилиэгин баһылыга Михаил Артемьев, өрөспүүбүлүкэ ыраах айаҥҥа суоппардарын түмсүүтүн салайааччыта Николай Мочкин, улуустааҕы «Биисинэс инкубатор» дириэктэрэ Николай Афанасьев, Амма улууһун ыраах айан суоппардарын түмсүүтүн салайааччыта Николай Акимов тириэртилэр, наҕараадалары туттардылар.
Ол курдук “Амма автоледи” уопсастыбаннай түмсүү салайааччыта Наталья Шишигина, Николай Неустроев, Иван Петров “Урбаан эйгэтигэр кылаатын иһин”, урбаан сайдыытыгар туйгун бэлиэтинэн Георгий Ноговицын, Егор Каримов, СӨ бочуоттаах ытык кырдьаҕаһын бэлиэтинэн Руслан Петров, “СӨ бочуоттаах бэтэрээнэ” бэлиэнэн Петр Уваров, Вероника Стручкова, Анатолий Иванов, Николай Устинов, СӨ атыы- эргиэн промышленнаһын палатын Махталынан Николай Алексеев, «Амма киэн туттуута» бэлиэнэн Николай Акимов, Амма улууһун баһылыгын Махталынан Ольга Шишигина, улуус дьокутааттарын Сэбиэтин Махтал суругунан Аркадий Павлов, Жилин Григорьев, Владимир Ксенофонтов, «СӨ ыраах айан бочуоттаах суоппара» бэлиэнэн Юрий Александров, Аркадий Павлов, Владимир Бушков, Василий Чабыкин, Николай Захаров, Георгий Ноговицын, Александр Скрыбыкин, Александр Гаврильев, Георгий Егоров, Павел Кралин, Амма нэһилиэгин Махтал суругунан «Амма автоледи» кулууп, Александр Сутаков, Николай Максимов, Николай Захаров, Александра Шестакова, Надежда Мухаметова наҕараадаланнылар. Маны сэргэ «»Амма автоледи » кулууп эрэллээх чилиэннэрэ Степанида Пестерева-Антонова, Ксения Татаринова, Галина Ефремова, Анна Акимова, суоппардар Афанасий Нестерев, Семен Игнатьев СӨ ыраах айан суоппардарын уопсастыбаннай түмсүүтүн Бочуотунай грамоталарын туттулар.
“Амма олоҕо” хаһыат