Урбаанньыт Валентина Нерлова нэһилиэнньэҕэ ритуальнай өҥө маҕаһыынын тэрийэн үлэлэппитэ хаһыс да сылыгар барда. Быйыл Валентина Петровна бырайыагын “Мин биисинэһим” Киин Амматааҕы салаата өйөөн, сүбэ-ама биэрэн “Социальнай урбаанньыт” буолан, грант ылары ситистэ. Урбаанньыт маҕаһыынын кэннигэр ритуальнай саала дьиэтин туттаран, дьону тиһэх суолугар атаарыы курдук ыарахан күннэргэ дьиэ-уот өттүнэн көмөлөһөр санааттан тэрийдэ.
Саҥа тутууну Амма улууһун дьаһалтатын муниципальнай сакаас сулууспатын начальнига Валентин Петров, Амма нэһилиэгин баһылыга Михаил Артемьев, “Мин биисинэһим” киин Амматааҕы салаатын салайааччыта Владимир Колосов, Бизнес-инкубатор салайааччыта Евгений Афанасьев көрдүлэр. Михаил Алексеевич бу эбийиэк Амма олохтоохторугар наадалааҕын бэлиэтээн туран Валентина Петровнаҕа 20 тыһыынча солкуобайдаах сертификаты туттарда.
Валентина Нерлова үлэтин, инники былааннарын туһунан маннык кэпсиир:
-Ритуальнай өҥө боппуруостарынан дьарыктаммытым 20-чэ сыл буолла. Билигин табаардарбын Новосибирскай куораттан таһабын. Быйыл бырастыылаһыы саалатын туттараммын билигин кыһалҕалаах дьон бу өҥөнөн туһаныахтарын сөп. Ол эбэтэр, элбэх дьиэ кэргэттэрдээх, дьиэлэрин ауратын харыстыыр, этээстээх дьиэлэргэ олорор дьон бу дьиэҕэ өлбүттээхтэрин сытыаран бырастыылаһыахтарын сөп буолуоҕа. Маннык саал Илин энэр улуустарыгар суоҕун кэриэтэ. Онтон биһиэхэ, тыа сиригэр олорор дьоҥҥо, маннык өҥө эмиэ олус наада дии саныыбын. Кэлин эбии сир биэрдэхтэринэ, бу хайысхаҕа өҥө көрүҥүн элбэтэн биэриэхпин баҕарабын. Саала иһигэр баар мебеллэрбин барытын бэйэм сүүрэн-көтөн, оҥорторон, аҕалан туруордум. Биллэн туран, манна барытыгар өйүүр дьоннордоохпун. Холобура ”Мин биисинэһим” киин Амматааҕы салаата грант ыларбар, полиграфическай өҥөлөрбөр күүс-көмө буолла. Ону таһынан улуус дьаһалтата эмиэ үп-харчы өттүгэр көмөлөстө. Граным үбүн бизнес-былаан быһыытынан туттар санаалаахпын. Үлэ элбэх. Ол курдук дьиэм таһыгар гравий куттаран, цеменнээн, ыскамыайкалардаан тупсаҕай гына оҥоруохтаахпын. Ритуальнай саала өҥөтүн сыанатын билигин этэр кыаҕым суох эрээри, куорат сыанатыттан биллэн туран лаппа намыһах буолуоҕа.