Анна Брызгаева салайааччылаах улуус киинигэр баар кинигэ маҕаһыына С.А.Новгородов аатынан «Айар» национальнай кинигэ кыһата сыл аайы ыытар көрүүтүгэр ааспыт сыл түмүгүнэн иккис миэстэҕэ таҕыста.
Амматтан кинигэ маҕаһыынын салайааччыта Анна Брызгаева «Айар» национальнай кинигэ кыһатын сыл аайы ыытар көрүүтүгэр быйыл даҕаны бастыҥнар ахсааннарыгар киирэн Дьокуускай куоракка ыҥырыы тутан чиэстэннэ, өйдөбүнньүк бэлэҕи, сэртэпикээти тутта. Маны тэҥэ маҕаһыын менеджер атыылааччыта Августа Догдонова Махтал суругу тутта. Санатар буоллахха, кинигэ маҕаһыына маннык көрүүгэ 2019 сыл түмүгүнэн 2 миэстэни, 2020 сылга 1 миэстэни ылбыта.
«2005 сылтан маҕаһыыммытыгар «Бичик» саҥа тахсыбыт кинигэлэрин, ону тэҥэ учуобунньуктары ылар буолбуппут. Дьоҥҥо Сахабыт сирин туһунан интэриэһинэй, билиитин – көрүүтүн байытар, научнай, уус – уран кинигэлэри дуогабарынан ылабыт. Билигин атыы көрүҥэ тупсан, менеджердэр куйаар ситиминэн ханнык кинигэ тахсыбытын биллэрэ, ыыта олороллор, онон туох уларыйыы буолбутун барытын билэ олоробут. Маҕаһыыммытыгар кинигэни сакаастааһыҥҥа, ылыыга, тиэйэн аҕалыыга Августа Егоровна Догдонова менеджердэри, буҕаалтырдары кытта быһаччы үлэлиир. Түмүк таһаарыытыгар кэнники үс сылга сырыттым. Манна элбэх киһи кэлэн кыттар, уопут атастаһар, элбэх этиилэээх, сонуннаах буолаллар, атыыны тупсарар туһунан санаа атастаһаллар, сорох сыл суруйааччылары кытта көрсүһүннэрэллэр. «Айардар» улахан таһымнаах быыстапкаларга элбэх ситиһиилээхтэр, атын тыллаах эрэгийиэннэргэ эмиэ сылдьаллар. Олоҕу кытта тэҥҥэ сайдан иһэллэр, саҥа технологиялары баһылыыллар, электроннай кинигэлэри эмиэ таһаараллар, сыана үрдээһинэ оҕустар даҕаны интэриэһинэй кинигэлэри оҥорон иһэллэр. Оҕо кинигэтигэр улахан болҕомтолорун уураллар, дьон санаатын болҕойон истэллэр, туох наадатынан үлэлииллэр, босуобуйалары элбэтэн иһэллэр, биһирэбили ылаллар.
Оҕо садын иитиллээччилэригэр кинигэлэр эмиэ тахсаллар. Биһиги анал кинигэ маҕаһыыннаахпыт, бородуукта, табаар быыһыгар атыыланар курдук буолбакка, дьоҥҥо табыгастаах дии саныыбын. Туох саҥа тахсыбыттан аҕала сатыыбыт. Саха норуотун сайдыытыгар аналлаах бэлэххэ анамммыт дьиэ аайы баар буолуохтаах кинигэлэр, энцилопедиялар тахса тураллар. Төһө да электроннай кинигэлэр баар буолбуттарын иһин, дьиҥнээх кинигэни туох да солбуйбат. Сахабыт тыла умнуллубатын, салгыы сайдан үөрэтиллэ турдун. Оскуолаҕа өйгө – билиигэ, литератураҕа сыһыаннаах күрэстэр элбээн истиннэр.. Онуоха биһиги маҕаһыыммыт кинигэ тарҕаныытыгар көмөлөһүөҕэ. «Айардар» бастыҥ хаачыстыбалаах дьоһуннаах кинигэлэри Арассыыйа, Дьобуруопа ырыынагар таһааралларыгар, Сахабыт сирин аан дойдуга, дойдуга билэ олороллоругар баҕарабын, — диэн этэр Анна Спиридоновна.
