Аммаҕа «Кэскил» уопсастыбаннай тэрилтэ «Кыайыы ойуура, үүн!» диэн ааттаах бырайыага түмүктэнэр түһүмэҕэ чугаһаата. Волонтердар, олохтоохтор көмөлөрүнэн ойууру тупсаран оҥоруу үлэтэ салгыы ыытыллар.
Аммаҕа уопсастыбаннай эколог Иван Иосифович Мохначевскай көҕүлээһининэн 2015 сыллаахха улуус кииниттэн 3 км сиргэ «Кыайыы ойуурун» аллеята баар буолбута. Бу ойуур салгыы үүнэригэр, көрүүлээх — истиилээх буоларыгар ааспыт сылга тэриллибит Римма Алексеева салайааччылаах «Кэскил» уопсастыбаннай тэрилтэ ылсан үлэлиир. «Кэскил» пуондата «Кыайыы ойуура, үүн!» бырайыага бу сылга Арассыыйа Президенин Гранын күрэҕэр кыайыылааҕынан тахсыбыта. Онон аһаҕас уонна уута суох кураанах сиргэ турар аллея ылсыбатах мастарын уларытар, хааппыланан нүөлсүтэр, уу кутар ньыманы олоххо киллэрэр биир улахан соруктаах.
«Бырайыакпытын сокуон өттүнэн көрүнэн, салалтаны, депутаттары, нэһилиэнньэни кытта сүбэлэһэн салгыы сайыннарар былааннаахпыт. Биһиги кими баҕарар кытта үлэлэһэргэ куруук бэлэммит. Субуотунньуктары тэрийэммит олохтоохтор көмөлөрүнэн ойуур күрүөтэ өрөмүөннэннэ, ото охсулунна, сирэ — уота ыраастанна. Хаачыстыбалаах, холобур буолар, үйэлээх үлэтин иһин улууспут депутата, урбаанньыт Станислав Терентьевкэ уу кутар улахан иһиттэр тирэхтэрин ис сүрэҕиттэн ылсан, кыһаллан оҥорон биэрбитигэр туспа махталбытын этэбит. Бырайыак олоххо киириитигэр маннык дьон өйөбүллэригэр тирэҕирэбит. Итинник судургу, сэмэй майгылаах үлэһит дьон көмөлөрүнэн тулабыт тупсар», — диэн этэр «Кэскил» пуонда генеральнай дириэктэрэ Римма Алексеева.