Амма улууһун Алтан нэһилиэгэр элбэх оҕолоох дьиэ кэргэн далбар хотуна Александра Тарабукина таҥас сууйтарар, иистэнэр уонна уһанар дьиэтин үөрүүлээхтик арыйда.
Александра Тарабукина биэс оҕолоох дьиэ кэргэн күн күбэй ийэтэ буолар. Олоххо көхтөөх көрүүлээх буолан, нэһилиэгин уопсастыбаннай олоҕуттан олох тэйбэт. Ол курдук 10 сыл устата дьахталлар кэмитиэттэрин салайан кэллэ. Аны аныгы кэм биэрэр усулуобуйаларын таба туһанан, социальнай контракт көмөтүнэн, “Александра” диэн ааттаан олох-дьаһах өҥөтүн оҥорор дьиэтин арыйда.
“Миэхэ нэһилиэк дьаһалтатын үлэһиттэрэ, таҥас сууйтарыы өҥөтө олус наада эбит, кырдьаҕастар да, нэһилиэнньэ да наадыйар. Онон манна социальнай контракка киирсиэн дуо диэн эппиттэригэр сөбүлэҥмин биэрбитим. Контракпытын көмүскээн, 250 000 солк ылан дьиэбин аһарга үлэлэһэн барбытым. Эргэ дьиэбин барытын уларытан манна үс сыахтаах оҥордубут. Ол курдук таҥас сууйтарыыта, иистэнии уонна уһанар сыахтар. Дьон бэйэтэ кэлэн бу өҥөлөрүнэн туһаныан сөп”, — диэн Александра Иннокентьевна кылгастык билиһиннэрэр.
Бу дьиэҕэ нэһилиэнньэ кэлэн улахан ыарахан таҥастарын сууйтарарыгар икки сууйар массыына, биир куурдар массыына баар буолар. Бэйэлэрэ да кэлэн туһаныахтарын, эбэтэр ыытан сууйтарыахтарын сөп. Аны Александра Иннокентьевна бэйэтэ дьахтар кэмитиэтин салайар буоларынан, иискэ эдэр хаһаайкалары үөрэтиэн баҕарар. Ону сэргэ бэйэтэ тарбаҕар талааннаах киһи буоларынан сакааска да иистэнэр. Маны сэргэ бэйэтин олох баҕа санаатын толорон маһынан арааһы уһанарга эмиэ сыахтаах. Манна кэлэн дьон оборудованиенан туһанан кыраны уһаныан сөп эбит.
“Өссө Гранҥа кыттан эбии үчүгэй иистэнэр быысапкалыыр массыына, оверлок, иистэнэр матырыйаал ылыахпын баҕарабын, уһанарга эмиэ эбии оборудование наада. Нэһилиэнньэҕэ өҥөнү оҥорор хас да былааннаахпын. Онтон төһөтө туоларынан инним диэки баран иһиэм. Бу түбүктээх үлэбэр, дьиэм өрөмүөнүгэр көмөлөспут дьоммор барҕа махталбын тиэрдэбин”, — диэн 4 оҕо эбээтэ, биэс оҕо тапталлаах ийэтэ инники былааннарын билиһиннэрдэ.
“Александра” олох-дьаһах өҥөтүн оҥорор дьиэ туһунан сиһилии “Амма олоҕо” хаһыакка суруйуохпут.