Амма улууһа Арассыыйа Географическай уопсастыбата ыытар “Арассыыйа дьиктилэрэ” диэн фестивалын чэрчитинэн Москубаҕа уонна Санкт Петербурга саха норуотун үгэстэрин, ырыатын тойугун билиһиннэрэн, араас маастар кылаастары ыытан кэллэ. Амматааҕы эдэр натуралистар станцияларын педагога, бэйэ дьарыктаах, СӨ Үөрэҕириитин туйгуна Александра Киренская Амма үүнээйилэриттэн хайдах чэй оҥорор, кини эмтээх отторун туһунан маастар-кылааһыгар үгүс киһи сылдьан, Саха сирин үүнээйитин, кини отун-маһын туһунан интэриэһиргээн иһиттэ, бэркэ сэҥээрдэ.
“Мин бу аан бастаан киэҥ, Арассыыйа таһымнаах фестивальга баран маастар-кылаас ыыттым. Чэйдэргин баран билиһиннэрэҕин диэн эппиттэригэр, эрдэттэн бэлэмнэнии барбыта. Ол курдук олохтоох эрэдээксийэ көмөтүнэн норуот эмчитэ Мария Евсеевна Петрова эмтээх отторун туһунан сахалыы дьоҕус кинигэтин нууччалыы тылбаастаппытым уонна бэчээттэтэн илдьэ барбытым. Дьэ бу кинигэҕэ баар Мария Евсеевна рецептарынан барытын көрдөрөн, билиһиннэрэн, маастар-кылааска сылдьыбыт дьон бары астыммыттарыттан, Сахабыт сирин айылҕатын, кини үүнээйитин туһунан наһаа үчүгэй өйдөбүллээхтэриттэн бэйэм да дуоһуйдум.
Маастар- кылаастарбыт олус истиҥ эйгэҕэ бардылар. Москубаҕа Зарядье пааркатыгар баар медиакииҥҥэ буолла. Сахабыт сирин бастайааннай бэрэстэбиитэлистибэтэ күүс-көмө буолла. Кэлбит дьон илдьибит отторбуттан бэйэлэрэ талан, кинигэҕэ баар рецептарынан чэй оҥостон бардылар.
Мин аҥардас чэй оҥоһуутун эрэ буолбакка, «Амма-Шанхай» чэй суолун историятын, чэй суолун туһунан кэпсээтим. Өссө 1944 сыллаахха Аммаҕа буолбут ыһыах туһунан документальнай киинэбитин көрдөрө -көрдөрө чэй истибит. Москубаҕа буолбут маастар- кылааспытын тэрийиигэ информациялары харыстааһыҥҥа исписэлиис Наталья Ивановна Селезнева кэлэн көмөлөстө.
Онтон Санкт Петербурга элбэх баҕайы сахалар олороллор эбит. Онно Амма Наахараттан төрүттээх Алексеевтар дьиэ кэргэттэрэ кэлэн анаан-минээн устан бардылар. Уопсайынан соҕуруу дьон биһиги оппуту-маспытын эрэ буолбакка, харысхалбытын, оҥоһуктарбытын сүрдээҕин интэриэһиргииллэр эбит. Холобура мин тэтиҥ мастан туочуканан массажтыыр оҥоһукпун сэҥээрэн атыыластылар. Оннук чэй набордарын эмиэ ыллылар. Уопсайынан бу сырыыттан мин бэйэм астынан, хайа сатыырбынан маастар-кылааспын ыытан кэллим диэн сыаналыыбын. Онон түмүкпэр миигин салайан, сүбэлээн илдьэ сылдьыбыт “Мин биисинэһим” киин салайааччытыгар Александра Михайловна Николаеваҕа, бэйэм үлэлиир тэрилтэбэр уонна кинигэлэри бэлэмнээн биэрбит “Амма олоҕо” хаһыат эрэдээксийэтигэр махтанабын”, — диэн Александра Николаевна санаатын үллэһиннэ.