Манчаары оонньууларын чэрчитинэн Ф.М. Охлопков аатынан сынньалаҥ пааркатыгар «Таатталыы оҥоһук» быыстапка-дьаарбаҥка аһыллыытыгар Саха Өрөспүүбүлүкэтин Ил Түмэнин бастакы вице-спикерэ Александр Жирков национальнай култуурунай сыаннастары харыстааһын уонна сайыннарыы улахан суолталааҕын бэлиэтээтэ.
Александр Жирков бэйэтин этиитигэр патриотизм уонна национальнай идиэйэ билигин Россияҕа уонна кини норуоттарыгар ураты суолталаммытын тоһоҕолоон эттэ. Кини саха норуотугар омук быһыытынан баар буолуутугар дьайар өрүттэри: бэйэҕэ эрэллээх буолууну, бэйэ-бэйэҕэ көмөлөсүһүүнү, ханнык баҕарар ыарахаттары көрсөн туран көмүскэһиини уонна тэҥ буолууну ыйда. «Биһиги сүрүн сыалбыт – саха норуота салгыы баар буоларыгар, сайдарыгар, хас биирдиибит бу идиэйэни илдьэ сылдьарыгар туһуланар», — диэтэ.
Норуот оҥоһуктарын суолтатын туһунан этэригэр Александр Жирков Борис Неустроев – Мандар Уус үлэтин уратытын тоһоҕолоон бэлиэтээтэ. Уруһуйдара саха норуотун дириҥ духуобунай уонна култуурунай сыаннастарын көрдөрөллөрүн эттэ. Кини бу айымньылары үйэтитиигэ уонна кэлэр көлүөнэлэргэ тиэрдиигэ үлэ булгуччу барыахтааҕын туһунан санаатын үллэһиннэ.
«Биһиги култуурабытын, төрүт үгэспитин уонна ускуустубабытын харыстыахтаахпыт. Хас биирдиибит тус бэйэтин уратытын харыстыыр кыахтаах улуу омук сыдьаана буоларын сүрэҕэр, өйүгэр-санаатыгар илдьэ сылдьара ханнык», – диэн эбэн эттэ.
«Таатталыы оҥоһук» быыстапка уопут атастаһар, ураты оҥоһуктары көрдөрөр уонна норуоттар икки ардыларынааҕы сибээһи бөҕөргөтөр түһүлгэ буолла.
Борис Федорович Неустроев-Мандар Уус – саха норуотун биллэр ууһа уонна үгэһин харыстааччы. Кини айымньылара норуот култууратын сайдыытыгар өҥөтө тугунан да сыаналаммат, суолтата үйэлэргэ өлбөөдүйбэт.