Новости "Центра "Мой бизнес"
Абый улууһун Данил Никонов социальнай хантараак ньыматынан лофт дьиэ тэрилин оҥорор
6 февраля 2023

«Социальнай хантараах» бырагырааманы туһанан дьон сэргэ бэйэтин сөбүлүүр дьарыгын сайыннарар, үлэ-хамнас тэринэр. Онуоха сүрүн ирдэбилинэн, бастатан туран, тустаах киһи олорор сиригэр  бастайааннай пропискалаах буолуохтаах уонна тиийинэн олоруу алын таһымыттан намыһах дохуоттаах буолуохтаах.

«Үлэһит киһи эстэр, өһөр тускута суох» дииллэринии, сатабыллаах киһи ханнык да кэмҥэ өлөн-охтон биэрбэт, куруутун дьарыктаах, илиитигэр туппутун ыһыктыбакка дьарыктанар киһи сайдар кэскиллээх.

Абый Абыйын олохтооҕо Данил Никонов тимири кытта өрө тустубута ыраатта. Кини үчүгэй сварщик буолан, дьоҥҥо-сэргэҕэ уруккаттан көмөлөһөрө, сакаас ылан уһанара, дьиэлэргэ ититии киллэрэрэ.

Ол эрээри наар босхону эрэ үрдүнэн үлэлэһэр аныгы үйэҕэ табыллыбатын өйдөөн,  сыбааркалааһын өҥөтүгэр уонна алюминийынан үлэҕэ социальнай хантыраак түһэрсэн, үлэтин атыннык тэриммитинэн барбыта.  5 сыл буолан баран 2021 с. бу үлэтин кэҥэтээри бизнес-былаан суруйан, көмүскээн, иккистээн социальнай хантараагынан үп ылан, ыра санааларын олоххо киллэрэргэ дьулуспута. Хайыы-үйэ сылтан ордук кэм ааһа оҕуста. Ол тухары Данил Васильевич туох саҥаны оҥорбутун, сатаабытын бүгүн билсиэххэ.

Данил Васильевич, үтүө күнүнэн, хоту сиргэ соччо-бачча тарҕана илик үлэнэн дьарыктанар эбиккин. Туохтан хайдах саҕалаабыккыный? Тоҕо бу үлэ көрүҥүн таллыҥ?

Сваркалыыр буолан тимири иһэрдиини уруккуттан интэриэһиргиирим. Ол эрээри анал станога хайдах буоларын да билбэт этим.  Онтон рекламаҕа ручной станогу көрөн, ону Москваттан сакаастаммыппыт. Сайтка скидка буола турар кэмигэр түбэһэн,  “Булат” диэн илии наборун сакаастаабытым. Онтубут күһүн ыйтан ордук буолан баран куоракка кэлтэ. Ону саас массыына суолунан аҕалтарбыппыт.

Материалын хантан, хайдах булунаҕын?

Барытын куораттан сакаастыыбын. Тимир сыаната наһаа ыараата, аны Абыйга дылы кэлиитигэр  харчытыгар таһаардахха сүрдээх охсуулаах. Ол иһин оҥоһуктарым да сыаналара кырата суохтар. Тимир эрэ буолуо дуо, тимир быһар диискэ, электрод, кырааска, шкурка, онтон да элбэх матырыйаал ороскуоттанар, туттуллар.

Тугу оҥороҕун? Аан бастакы оҥоһугуҥ туох этэй?

Бастакы үлэм садовай хачыал этэ. Син бэркэ табыллан, санаам көтөҕүллэн, салгыы сакаас ылбытым. Сыаната ыарахан да буоллар, сакаастааччылар син бааллар. Былырыын улуус дьонугар ватсап группаҕа аныгы кокон хачыалы розыгрышка оонньоппуппут. Ол билигин кыайыылаах киһи дьиэтин таһыгар турар. Сайыҥҥы үчүгэй күннэргэ элбэх оҕо оонньуур. Онон дьоҥҥо туһалаах эбит диэн үөрэ саныыбын.

Оҕобут оскуоланы бүтэрэригэр төрөппүттэр кыттыһан, ыскамыайка оҥорон бэлэхтээбиппит. Оскуола тиэргэнигэр сүрдээх үчүгэйдик турар. Кэлбит барбыт ыалдьыкка, оҕолорго, учууталларга күһүҥҥү, сааскы бириэмэҕэ сынньанар сир буолла.

Абыйым дьоно садовай скамейкалары быйыл сакаастаан ыллылар. Сайынын тиэргэннэригэр туруоран, араас сибэккинэн киэргэтэн, дьиэлэрин таһын көстүүтүн тупсаҕай гына оҥостоллоругар көмөлөһөбүн диэн астынабын. Оннукка киһи сынньанарыгар да оһуобай.  Ону таһынан сахалыы оһуордаах атахтаах гына остуоллары оҥорбутум. Уонна кулууптарга, библиотекаҕа слайд көрдөрөр дуоска оҥоһулунна. Онтон да атын кыра быстах үлэлэр, полкалар, сибэкки иһиттэрэ элбэхтэр.

Бү үлэ туох уратылааҕый, ыарахаттар да баар буоллахтара?

Ханнык баҕарар үлэ туспа бичиктээх буолар. Ол курдук, бу дьарык эмиэ үлэтэ түбүктээх, элбэх тимири быһаҕын, матырыйаал элбэх ороскуоттанар. Ону кытта оҥоһугу барытын кырааскатын табан, кырыыларын көмүс сотуулаан киэргэтиэххэ сөп. Саамай ыарахана — матырыйаал булуута. Атына баҕа уонна сүрэх баар буоллаҕына тахсар.

Бу дьарык туһунан анаан хасыһан үөрэтэҕин дуу?

Күүскэ хасыһан үөрэппэтэрбин да,  сакаас киирдэр эрэ санаабыттан ылсан саҕалаатахпына табыллар. Хам-түм, интернет үчүгэй кэмигэр, киирэн көрөбүн, бу үлэнэн дьарыктанар ватсап группаҕа баарбын. Онно республикаҕа биллэр уустар сүбэлэрин-амаларын истэбин, бэйэбэр барсарын ылынабын. Уонна “Байдам” сурунаалга элбэхтэ тахсар. Ону ааҕабын.

Билигин тугу оҥороҕун, инники былааннарыҥ?

Аныгы Лофт мебели оҥоруунан дьарыктаныахпын баҕарабын. Ол оҥоһуутун үөрэтэбин. Былырыын оннук стилинэн ахсааннаах киһи остуол сакаастаабыта. Үчүгэй, туттарга удобнай дииллэр. Быйыл орон оҥорон көрүөм.

Тимиринэн туттар идэҕэр кими эмэ үөрэтэҕин?

Улахан уолбун сварка үлэтигэр сыыйа үөрэтэн чугаһатабын. Болгарканан тимири быһар, станокка токурутарга тимири бэлэмнииргэ үөрэннэ. Ону таһынан дьоҥҥо итиини киллэрэргэ тэҥҥэ сылдьыһан көрөн-истэн, маннык буолар эбит диэн толкуйдуур, илии-атах буолан абырыыр. Кэнники улаатан истэхтэринэ бэйэлэригэр хаалар дьарык буоллаҕа.

Нэһилиэгиҥ тас өттүттэн атыттартан сакаас ылаҕын?

Улуус иһиттэн сакаастаныан баҕалаахтар билсиэхтэрин сөп. Аныгы үйэҕэ телефон нүөмэрин булар уустук буолбатах.  Быйыл элбэх киһи уһун буран хайыһарын оҥоттордо. Билигин да кыралаан сакаас киирэ турар. Сынньалаҥ миэстэлэригэр, сквердэргэ дьоҕус скамейкалары, сибэкки уурар полкалары оҥоруохпун сөп.

Данил Васильевич, истиҥ кэпсэтииҥ иһин улахан махтал, саҕалаабытыҥ сатаннын, туппутуҥ тубустун, толкуйдаабытын туола турдун!

«Хотугу кыым» хаһыат, Абый улууһа