Ураһалаах орто оскуолата Абый улууһун агропрофилированнай хайысхалаах оскуолаларыттан биирдэстэрэ. Оскуола хас да хайысханы тутуһан үлэлиир: ынах, сылгы иитиитэ, үүнээйи, оҕуруот аһын үүннэрии, улахан кылаас уолаттара тыраахтары уонна бураны ыытар көҥүллээх оскуолаттан тахсаллар, оттон кыргыттар — бэргэһэ тигэр идэлээх.
Бу күннэргэ 2 ынахтара төрөөн, олохтоох нэһилиэнньэ сибиэһэй үүтү, кефиры ылан астынар. «Оскуола 4 ыанар ынахтаах. Саҥа ыанньыксыттанныбыт — Берёзкина Виктория Валерьевна. Этэҥҥэ буоллаҕына өссө икки ынах төрүөхтээх. Уопсайа 11 төбө сүөһү баар. 3 төбөнү күһүн идэһэлээбиппит», — диэн кэпсиир оскуола социальнай педагога Мария Шкулева.
Сутуруохаҕа өссө 2000 с. тыа хаһаайыстыбатын салаатынан тутуллан турбут ынах сүөһүнү эспиттэрэ. Чааһынайдар ииппэттэр. 2013 с. бу балаһыанньаны тупсарар сыалтан агрооскуола Абыйтан икки саҥа төрүүр ынаҕы уонна атыыр оҕуһу атыылаһан, хотон оҥостон, ынах сүөһү иитиитинэн дьарыктанан саҕалаабыта.
Төһө да ыарахаттары көрүстэр, оскуола коллектива, салалтата тыа оҕолоругар төрүт дьарыгы иҥэрэр уонна нэһилиэнньэни кыалларынан сибиэһэй үүт бородууксуйатынан хааччыйар сыаллаах бу дьарыгын салгыыр.
Сайынын ынахтара барыта ыанар кэмигэр үүт аһылык көрүҥүн өссө элбэтэллэр уонна Белай Гора кырдьаҕастарыгар сакааһынан биэрэллэр. Күһүнүн идэһэлэнэн остолобуойдарын бэйэ бородууксуйатынан хааччыйаллар, нэһилиэнньэҕэ амсаталлар.
Оҕолор сүөһүнү көрөргө, ынаҕы ыырга, оттуурга, үүт ас астыырга, идэһэни астыырга, хаан кутарга тиийэ үөрэнэллэр. Кыргыттар хотоҥҥо ыам ыйыгар практика бараллар.
Үрүҥ аһы начаалынай кылаас учуутала Мария Герасимовна Стручкова астыыр.
