Кэлиҥҥи кэмҥэ, ордук үөс сирдэргэ, бородуукта сыаната үрдээһинин туһунан үгүс оруна суох кэпсэтиилэр тахсыталаатылар. Ол ыраах сытар, суола-ииһэ уустуктардаах улуустарга дьон-сэргэ дьаарханыытын үөскэтиэн сөп. Билигин интэриниэт ситимигэр арҕааҥҥы судаарыстыбалар информационнай харгыстары үөскэтэллэриттэн тахсара саарбаҕа суох. Абый улууһугар сыана бэлиитикэтэ хайдах үлэлиирин улуус баһылыга Станислав Цюхцинскай «Хотугу Кыым» ааҕааччыларыгар иһитиннэрдэ.
— Дьон-сэргэ олоҕор суолталаах табаардар сыаналара үрдүүрүн хонтуруоллуур инниттэн оперативнай ыстаап тэрийэммит күннэтэ сыананы хонтуруоллаһабыт, кэтиибит. Оперативнай ыстаапка тустаах, эппиэтинэстээх тэрилтэлэр бэрэстэбиитэллэрин тэҥэ, улуус нэһилиэктэрин баһылыктара эмиэ киирэллэр. Инньэ гынан, ыраах турар нэһилиэктэрбитигэр сыана эмиэ хонтуруолланар. Билиҥҥитэ улууска сыана үрдээһинэ бэлиэтэммэт. Аныгыскы уу суолунан кэлэр табаардарга диэри хааччыллыы баар. Түгэнинэн туһанан, олохтоох урбаанньыттарга, дьоҥҥо суолталаах табаардар сыаналарын сөптөөхтүк туталларын иһин махтаныах тустаахпын, — диэн Станислав Янович кэпсээтэ.
Билиҥҥитэ атыы-эргиэн логистическай киинигэр төһө бородууктанан хааччыллыбыттарын ыйыппыппар «Билигин баран, маҕаһыыҥҥа кэлбит табаардары, сыананы көрүөххэ», — диэн, тутатына «Якутоптторг» Абыйдааҕы базатыгар тиийдибит. База дириэктэрэ Оксана Заровняева көрсөн үлэ хайдах барарын туһунан сырдатта.
— Көрөргүт курдук, сыана үрдээһинэ суох. Сайаапка быһыытынан ыыппыт табаардарбыт суолларын тутатына болҕомтоҕо ыланнар, утары ыытан иһэллэр. Холобурун эттэххэ, бэҕэһээ (кулун тутар 9 күнүгэр) 24 т бородуукта базабытыгар кэллэ. Өссө 50 т табаар бу ыйга кэлэрэ күүтүллэр, — диэн Оксана Ивановна билиһиннэрдэ.
Манан сиэттэрдэххэ, сыана үрдээһинигэр дьон-сэргэ долгуйуута оруна суох буолар. Арассыыйа Федерациятын, өрөспүүбүлүкэ бырабыыталыстыбата, улууска, нэһилиэктэргэ тэриллибит сыана үрдээһинин хонтуруоллуур оперативнай ыстааптар норуот туһугар сөптөөх үлэни ыыталлара инникигэ эрэли эрэ саҕар.
