Улуустар көҕүлээһиннэринэн, тыа хаһаайыстыбатын кээпэрэтииптэрин уонна пиэрмэрдэрин өйүүр ресурснай киин миэстэтигэр тиийэн, туох-ханнык кыһалҕалар баалларын уонна үлэ хайдах салаллан иһэрин көрөллөр, көмө оҥороллор. Абый улууһугар “Агростартап” уонна “Дьиэ кэргэн ферматын сайыннарыы” программаларынан сэминээри киин компетенцияҕа отделын начальнига Айар Кириллов уонна экономист Майя Гуляева ыыттылар.

Иван Слепцов – ИП, КФХ баһылыга. 2015 сыллаахха “Дьиэ кэргэн фермата” граны ылбыт. Оттоох Атах учаастагар 2012 сыллаахтан ынах сүөһүнү уонна сылгыны иитэр. Муус устарга сүөһүтүн ахсаана 101, ол иһигэр ыанара — 35, сылгыта 76, ол иһигэр биэтэ — 56. Гранын харчытынан 100 сүөһү киирэр хотонун туттубут. Сылгытын базата Мохсоҕоллооххо баар, 5 гектар, эбийиэгин кыаҕа — 100 төбө.

Үүтэ, сүөгэйэ, этэ уо.д.а. Абый сэлиэнньэтигэр, улуус киинигэр тарҕанар.

Оттоох Атах учаастак Абый сэлиэнньэтиттэн 30 км ыраах сытар. Манна 50 киһи олорор. Оскуола-саад, дьаһалта, кулууп, ФАП бааллар. Иван Иванович этэринэн, учаастагы хаста да саба сатаабыттар. Ити эрээри оҥорон таһаарыы баар буолан, «тыыннаах». Быйыл өссө саҥа хочуолунай уонна электроыстаансыйа тутуллуохтаах.

Абый сэлиэнньэтигэр кытта «филиаллаах», онно 11 төбө баар.

Сүөһү, сылгы төбөтүн элбэтэр баҕалаах, онно сөптөөх мэччирэҥ, ходуһа баарын этэр. Быйыл бэйэ күүһүнэн хотонун улаатыннарар уонна иккистээн “Дьиэ кэргэн фермата” граҥҥа кыттар санаалаах, оттуур техника ыларга былааннанар. Куонкурус бэрээдэгэ ону көҥүллүүр.

2021 сылга ИП буолбут Анатолий Стручков эмиэ сүөһүлээх, сылгылаах. Барыта 38 төбө сүөһүлээх, ол иһигэр ыанара 30, сылгыта 30, ол иһигэр биэтэ 22. Сүүс төбө киирэр хотонноох. “Тирэх” ТХПК үлэтин тохтоторугар кини хаһаайыстыбатын ылбыт. «Агростартапка» кыттаары сылдьар. Баазалаах, эбии дохуот киллэринэр үлэлээх – пилорамалаах. Манта бизнес-былаан суруйарыгар олус көмөлөөх буолуон сөп, “окупаемость проекта” диэн критерийыгар.

Источник: hotugu_kyym