Абаҕаҕа үүтү аһы оҥорон таһаарар сыах үлэҕэ киириэ
26 марта 2026
Строд аатынан хаһаайыстыба муус устар ыйга үүт аһы астаан таһаарар сыаҕын үлэҕэ киллэриэ. Күн бүгүн манна оборудованиелары таҥыы түмүктэнэн эрэр. Бу тутуу тыа хаһаайыстыбатын өйөөһүн кыра кыамталаах тутуулары ыытар бырагырааматынан ыытылынна.
Строд аатынан хаһаайыстыба (бэр. ВА.В. Тимофеев) салалтатынан ааспыт сылга ситиһиилээхтик үлэлээн, бу үүммүт сылга эрэллээхтик үктэммитэ. Күн бүгүн манна “Абагаагро” соҕотуопкалыыр тэрилтэтэ үүт астыыр сыаҕын үлэҕэ киллэрээри күннэтэ түбүгүрэ сылдьар. Улуус баһылыга Степан Кузьмин, солбуйааччылара Николай Ларионовы, Виктор Смирникову уонна Ион Кононовы кытта сыах үлэҕэ бэлэмин көрдүлэр.
“Быйыл биһиги улууспутугар биллэриллибит Тыа хаһаайыстыбатын сылынан төһө да үп-харчы кырыымчык буоллар, бэйэбитигэр баар боломуочуйаларынан бу салааҕа 34, 7 мөл солкуобайы көрбүппүт. Ол быһыытынан кыра кыамталаах тутууларга бу маннык кыра үүт аһы астыыр сыахтары тутуу киирбитэ. Строд аатынан хаһаайыстыба улууспут биир улахан, кыахтаах хаһаайыстыбата буолар. Кини хас д салаалары тэҥҥэ тутан, ситиһиилээхтик үлэлиир. Ол биир туоһутунан бэйэлэрин бородууксуйаларын астыыр сыаҕы тутан үлэҕэ киллэриилэрэ буолар. Бу үүт сыаҕа биир сменаҕа 3 туонна үүтү астыыр кыахтаах. Билигин манна оборудованиелара кэлэн ону туруоруу бара турарын көрдүбүт.
Саамай үчүгэйэ бу сыахха автоклав нөҥүө баран өр кэмҥэ харайыллар үүт бородууксуйата астаныа. Ол бэйэ бородууксуйатынан оскуолаларбытын, уһуйааннарбытын хааччыйыыга кыах биэрэр. Астыыр да көрүҥнэрэ элбэх буолуо. Эбийиэк газгольдерынан ититиллэн, оборудование таҥыллан бүттэ да, үлэҕэ киириэҕэ. Бу мантан саас үүт элбиир кэмигэр маннык аныгы ирдэбилгэ эппиэттиир сыах үлэҕэ киирэн, ыаныллыбыт үүт араас бородууксуйа буолан улууспут олохтоохторугар тиийиэ диэн бигэ эрэллээхпин”, — диэн улуус баһылыга Степан Николаевич санаатын үллэһиннэ.