Ийэ, учуутал, уһуйааҥҥа төрөппүт комитетын председателэ, профком чилиэнэ, нэһилиэк Сэбиэтин дьокутаата, общественнай тэрилтэ салайааччыта… Аҕа, бааһынай хаһаайыстыба салайааччыта, урбаанньыт, инженер идэлээх, тутааччы, булчут, спортсмен… Бу эдэр ыаллар Лукерия, Ньургун Платоновтар билиҥҥи кэмҥэ үлэлии-хамсыы сылдьар эйгэлэрэ. Ярослава уонна Модест диэн оҕолордоохтор.

Аҕыйах хонуктааҕыта Кировскай нэһилиэгин ыал дьоно, бэйэлэрин күүстэринэн, Дьокуускайга маҕаһыын арыйбыттарын туһунан сонун киэҥник тарҕаммыта. Буолаары буолан, маҕаһыыннарын төрөөбүт, олорор бөһүөлэктэрин аатынан “Асыма” диэн ааттаабыттар. Киһи соһуйара, сэҥээрэрэ, үксүн киин сир урбаанньыттара тыа сиригэр тугу эрэ арыйбыт, тэрийбит буолаллар ээ.

Лукерия Аһыма олохтооҕо. Оскуоланы бүтэрэн баран Нерюнгри куорат ХИФУ филиалыгар техническэй институтка үөрэнэ киирэр. Ити кэмнэргэ, кэргэнин Ньургунун көрсөн ыал буолаллар. Олоххо көхтөөх дьон, ити кэмнэргэ уопсайдарын хоһугар, бэйэлэрин курдук устудьуон дьоҥҥо анаан, кыра маҕаһыын арынан үлэлэтэллэр. Атыыттан киирбит харчыларыгар, истипиэндийэлэрин эбинэн бастакы массыына ылаллар.

Үөрэхтэрин ситиһиилээхтик бүтэрэн, кыыс дойдутугар, Кировскайга кэлэн олохсуйардыы оҥостоллор. Үөрэхтэрин бүтэрэн баран, эдэр ыал кыыс дойдутугар Аһымаҕа кэлэн олохсуйардыы оҥостоллор. Ыал аҕата 2018 с. бааһынай хаһаайыстыба тэринэр. Ити сыл ИЖС бырагырааматын нөҥүө субсидия ылан, дьиэлэрин көҥдөйүн тутталлар. “Дьиэбит көҥдөйүн Мэҥэ Хаҥаластан биригээдэ кэлэн туппута. Тутууга сыстаҕас буолан, Ньургун дьиэбит ис, тас отделкатын бэйэтэ оҥорор. Быйыл дьиэбитигэр киирэрдии тэринэ сылдьабыт”, – диэн ыал ийэтэ үөрэ сэһэргиир.

Билигин эдэр ыал аҕыс ыанар ынахтаахтар. Онтукайдарын аймах дьонун кытары бары көмөлөөн, оттоон-мастаан, көрөн-истэн олороллор. Сайын Харыйа сайылыкка көһөн тахсаллар. Отторун биир “Синтай” тыраахтардарын көмөлөһүннэрэн, үксүн илиинэн оттууллар. Төһө да ходуһа сирдэрин бүтүннүү оттообуттарын үрдүнэн, от атыылаһарга күһэллэллэрин Лукерия хомойо кэпсиир. Оннук ээ, ийэ киһи долгуйара оруннаах буоллаҕа.

Ыал аҕата Ньургун, кичэм санаатын толорон, быйыл өрөспүүбүлүкэбит килбэйэр киинигэр Дьокуускайга ас-үөл маҕаһыынын аспыт. Маҕаһыыннарын кыыс дойдутун аатынан “Асыма” диэн ааттаабыттар. Эдэр ыал баҕа санаалара, Дьокуускай куорат олохтоохторугар дойдуларын сибиэһэй, бэйэ оҥорон таһаарбыт бородууксуйатын атыылыыр баҕа санаалаахтар. “Инникитин олохтоох тыа хаһаайыстыбатын кэпэрэтииптэрин кытта сөбүлэҥ түһэрсэн, кинилэр оҥорон таһаарбыт бородууксуйаларын дьоҥҥо-сэргэҕэ тарҕатар санаалаахпыт“, – диэн эдэр ыал санаатын үллэстэр.

Ыал ийэтэ Лукерия алын кылаас учуутала. Икки сыл кини үөрэтэр кылааһа “Бастыҥ кылаас” аатын оскуолаҕа ылбыт. Маны таһынан оскуола иһинэн тэриллибит “Туйгун” кэмиэрчэскэйэ суох тэрилтэни салайсар. Оҕолорго патриотическай иитиигэ аналлаах бырайыак көмүскээннэр, былырыын улууска ыытыллыбыт граҥҥа кыайаннар 50 тыһ. солк. харчыны ылбыттар. Ол бырайыактарын номнуо олоххо киллэрбиттэр. Быйылгы ыытыллыбыт президент граныгар Кировскай нэһилиэгиттэн Аҕа дойду сэриитигэр барбыт буойуттар ааттарын үйэтитиигэ суруйбут бырайыактара 0,7 баал хапсыбакка, грант ылбакка хаалбыт. “Аныгыскы бырайыакка өссө үчүгэйдик бэлэмнэнэн, инники сыыһалары көннөрөн бырайыакпытын куоҥкуруска хат ыытыахпыт“, – Лукерия Васильевна санаата бөҕөх.

“Аһымал акцияларга төһө кыттааччыгытый?” диэн ыйытыыбар бэрт сэмэйдик эрээри, чахчы, эр доҕоруттан киэн туттардыы кэпсиир: “Кэргэним, саҥа дьыл саҕана, бородуукта бөҕөтүн атыылаһан кэллэ. Уонна сэлиэнньэбит элбэх оҕолоох ийэтигэр көмө быһыытынан биэрбитэ. Ньургун тоҕоос көһүннэр эрэ, өрүү дьоҥҥо көмөлөһөр, өйүүр. Оттон уонна “Елка добра” акцияҕа өрүү кыттыһабыт“, – диир.

Сахалар “дэгиттэр” диэн тылы, бары өттүнэн сатабыллаах, хотуулаах киһиэхэ анаан туттааччылар. Бу сырыыга ити тылы Платоновтар дьиэ кэргэттэригэр тутуннахха, бука, киһи сыыспат. Аныгы ыччат дьоҥҥо холобур буоларга дьулуһар ыаллар биһиги улууспутугар баалара үөрдэр эрэ.

Василий Тимофеев

Источник: https://ulus.media/2021/02/12/a-yma-eder-yallara-dokuuskajga-ma-a-yyn-aryjdylar/