Амма бааһынай хаһаайыстыбалара бэйэ-бэйэлэригэр көмө буолар, үлэтэ кыайтарбакка сылдьар кэллиэгэлэригэр тиийэн субуотунньуктууллар. Улуус бааһынай хаһаайыстыбаларын Ассоциациятын бэрэссэдээтэлэ Александра Цыпандина бука бары түмсүүлээх буолалларын курдук үлэни тэрийэр.

“Биһиги улуус бааһынайдара олус иллээхтэр. Бэйэ-бэйэлэригэр туох кыһалҕа баарынан көмө-тирэх буолаллар. Холобура, ким эрэ саҥа хотон туттар буоллун, эбэтэр кимиэхэ күрүө оҥоһуута буоллун ким бириэмэлээҕинэн тиийэн субуотунньуктуубут. Бу аҥардас үлэ диэн буолбакка, түмсүү, санаа атастаһыыта буолар. Субуотунньукка тиийэн бэйэ-бэйэни кытта кэпсэтэн,  уопут атастаһан, үлэни үмүрү тутан бириэмэни туһалаахтык атааран кэлэбит. Бу күннэргэ Эмискэ  Михаил Афанасьевич Бубякин баһылыктаах бааһынай хаһаайыстыбаҕа тиийэн көмөлөһөн кэллибит”, — диэн Александра Николаевна кэпсиир.

Урукку кэмнэртэн тиийэн кэлбит субуотунньук диэн өйдөбүл күн бүгүн үгүс үлэни бары саба түһэн бүтэриигэ саамай көдьүүстээх үлэ көрүҥэ буоллаҕа. Ону сыспай сиэллээхпитин, хороҕор муостаахпытын дэлэтиигэ үлэлэһэ сылдьар дьоммут өрө тутан, бэйэ-бэйэлэригэр көмөҕө тиийиигэ туһаналлара холобур эрэ буолуон сөп.

Ааптар: “Амма олоҕо” хаһыат