Нам улууһугар өрүс нөҥүө сытар Көбөкөн нэһилиэгэр Ия Колесова эдэр урбааньыт таһаарыылаахтык үлэлии-хамныы сылдьар. Дьон күннээҕи аһын килиэби хаачыстыбалаахтык астыыр.

— Мин бэйэм 2015 сылтан бэкээринэ үлэлэтэн саҕалаабытым. Ол иннинэ Мария Слепцова бэкээринэтигэр икки сыл үлэлээбитим. Онтон Татьяна Федотова “Урукку ЖКХ дьиэтигэр бэкээринэ тэринэн үлэлиэҥ дуо?” диэн этиигитэр сөбүлэспитим. Муспут харчыбар 100 тыһ. солк бурдук атыыласпытым.  Бырайыак толкуйдаан, бэйэ дьыалатын тэринэн үлэлииргэ социальнай контракка кыттыбытым. Онно көмө харчы ылыам диэн. Ону бөһүөлэк бэкээринэлээх, нэһилиэнньэ ахсаана аҕыйах диэн аккаастаабыттара.

2017 сылга Дмитрий Дмитриевич нэһилиэк баһылыга көмөтүнэн үлэтэ суох киин нөҥүө учуокка турбутум. Ол онтон 150 тыһ. солк көмө ылан оһох уонна бэйэм харчыбынан тиэстэ мэһийээччи, халыып ылбытым.

— Үлэҕэ тугу саҥаны киллэрдиҥ?

— Итинник курдук, хас да сыл килиэп астаан үлэлии сылдьыбытым. Онтон эбии тугу эмит астаан атыылыах санаа киирбитэ. Биир үтүө күн улууспутугар баар бэкээринэлэр бөлөхтөрүгэр СХПК «Илгэ»тэрилтэтин кытта кэпсэтэн, онно буулачыка, батон астыырга үөрэммитим. Ону туһанан, астаан атыылаабытым. Аны пицца буһаран атыыга таһаарыахпын баҕардым. Тоҕо диэтэххэ, ыраах улуус киинигэр эрэ бардахха сиир аспыт буоллаҕа дии. Уһуннук онно үөрэнэр сир көрдөөтүм, булбутум, сороҕор иллэҥ кэмим тиийбэккэ барбаппын. Кэлин олох да харантыын буолан, туох да үлэлээбэтэҕэ. Арай сайынын ыаллыы кыыс кэллэ. Кини куоракка пиццерияҕа үлэлиир. Хайдах астыыры, кистэлэҥин көрдөрбүтэ, ону астаат атыылаан бардым. Ону тэҥэ маникюр оҥорорго үөрэммитим. Үлэм таһынан тыҥырах оҥорор сөбүлүүр дьарыгым буолар. Эбии кыламан оҥоробун. Ону олох хирург үлэтигэр тэҥниибин. Сарсыарда эрдэттэн үлэлиир киһиэхэ ыарахан баҕайы, наһаа сыралаах үлэ. Рамен Масамунэ рестораҥҥа үлэлиир уолга суши оҥорорго үөрэммитим. Эдьиийим Маша Иванова сүбэлээбитэ. Онон билигин суши да оҥорон, нэһилиэгим олохтооҕун күндүлүүбүн. Ити үөрэҕим барыта харчыга барбыта, үксэтигэр сертификаттаахпын. Бу сайын иһэр уу сакаастыыр сулууспатын арыйдыбыт.

— Инникитин туох былаан баар?

— Инникигэ былааным элбэх. Ол да буоллар соҕотох киһи оҥороро бытаан, харчы өттүгэр ыарахаттар бааллар. Өссө эбии чугас сытар Фрунзе нэһилиэгэр килиэп илдьэн саҕалаатым. Билигин сыалым-соругум диэн сакааһы таһарга кыра массыына ылыммыт киһи диэн баҕа санаалаахпын.

Ия Дмитириевна бириэмэ булан оскуола, нэһилиэк уопсай тэрээһиннэригэр көхтөөхтук кыттар, тэҥҥэ үлэлиир хамныыр эбит. Баҕарабыт кини дьиэ кэргэнигэр доруобуйаны, элбэх ситиһиини, инники былаанарын өссө да туола турдуннар.

Марфа Тарабукина,

Заведующий обособленным подразделением ГАУ РС(Я) «Центр «Мой бизнес» в Намском районе