Билиҥҥи кэмҥэ, чуолаан дойду үрдунэн сабардаан турар саҥа коронавируснай дьаҥ кэмигэр, араас «онлайн», «дистанционнай» уонна да атын интернет ситимин нөҥүө атыылааһын киэҥник тарҕанна. Бүгүн мин эһиэхэ Горнай Бэрдьигэстээҕиттэн урбаанньыт Снежана Варламова туһунан билиһиннэриэхпин ба5арабын. Снежана бэйэтин олоҕун сүрүн учууталынан күн күбэй ийэтин Анна Афанасьевна Слепцованы ааттыыр.»Үөрэх таһынан иис куруһуога – миэхэ дьиэбэр буолара. Наһаа элбэх бириэмэни ийэбин кытары атаарарым. Иккиэн куукулаларбар таҥас толкуйдаан, айан тигэрбит. Бэйэм тугу эмэ илиибинэн оҥорон таһаарарбын наһаа сөбүлүүрүм. Ордук кумааҕы куукулаҕа таҥас уруһуйдаан кырыйарым. Кэнники санаатахпына, ийэм барахсан миигин оҕо бэйэтэ оҥоро үөрэнэр ньыматынан үөрэппит эбит. Оҕо эрдэхпиттэн кини хайдах тигэрин, быһарын, муодалыырын көрө улааппыт буоламмын иискэ сыстаҕаспын. Биһиэхэ таҥаспытын ырбаахыттан саҕалаан сонугар тиийэ барытын бэйэтэ тигэрэ, баайара«,- диэн олус истицник ахтар.
2009 с. И.И.Фадеев аатынан Дьокуускайдааҕы ФЭК ситиһиилээхтик бүтэрэн, финансист идэтин баһылаан, кыра маҕаһыын арынан, урбаанньыттар кэккэлэригэр киирэн бизнес эйгэтигэр үктэммит. Онтон саҕалаан дизайнер буолар ыра санаата үүйэ-хаайа тутан, бэйэ оҥоһугун атыылаан саҕалыыр. Араас граннарга кыттан, судаарыстыба өйөбүлүн ылан, ийэтин кытта Бэрдьигэстээххэ “Южнай” атыы-эргиэн дьиэтигэр быыкаа хоһу арендалаан, ателье арыйаллар. Манна бэйэлэрэ тикпит таҥастарын атыыга таһааран, дьон сакааһынан тигэн үлэлэрин саҕалыыллар. Саҥа саҕалааһыҥҥа биллэрин курдук төһө даҕаны ыарахаттары көрүстэллэр, уһун кэмҥэ ыра санаа оҥосто сылдьыбыт ба5а санналара туолбутуттан олус үөрэн, дьоллонон, туох баар санааларын ууран туран улэлээбиттэрин бэлиэтиир. Былаан бөҕөтүн оҥостон, үлэ үөһүгэр сылдьар кэмнэригэр Снежана ийэтэ эмискэ ыарахан ыарыыттан ыалдьан күн сириттэн барбытыгар, ис туруга ыһыллан кылгас кэмҥэ урбаанньыттыырын тохтотон кэбиьэр.
Бириэмэ ааспытын кэннэ, 2017 сыллаахха Снежана кэргэнэ Александр Казахстан биллэр дизайнерыгар Лаура Базарбаевнаҕа иис кууруһугар үөрэнэр сертификат бэлэхтээбит. Казахстаҥҥа түөрт ый үөрэнэн, талааннах, дьаныардаах кыыс экзаменнарын экстернынан туттарбыт. Онтон ыла таҥас тигиитигэр төннөн, билигин айымньылаахтык улэлии-хамныы сылдьар. «Дизайнер быһыытынан бэйэбин күннэтэ сайыннарабын, эбии куурустарга үөрэнэбин. Онон оҕо эрдэхпиттэн модельер-дизайнер буолар ыра санаам туолан, кэргэмминээн Александрдыын дьиэ кэргэн дьыалатын арыйан үлэлэтэбит. Туруоруммут сорукпун ситиһэрбэр кэргэним улахан өйөбүл буолар, киниэхэ махталым муҥура суох«,- диир Снежана.
“SNEZHANA KIDS” диэн үрдүк хаачыстыбалаах трикотаж матырыйаалтан күннээҕи, спортивнай, аныгы истииллээх оҕо таҥаһын коллекциятын оҥорон тигэн таһаарар. Таҥастар барыта ГОСТ-нан сертификаттаах, көҥүллээх, ирдэнэр лабораторнай чинчийиини ааспыттар. Yлэлэригэр муоданы аьары батыспакка, төһөнөн таҥас судургу муодалаах, соччонон тупсаҕай, кэтэргэ табыгастаах буолар диэн санааны тутуьан улэлииллэр. Бу кэпсэнэр коллекцияны Wildberries сайтка SNEZHANA KIDS диэни булан көрүөххүтүн сөп. Тацастарын дьон-сэргэ собулээн Саха сириттэн эрэ буолбакка, Арассыыйа араас куораттарыттан, кыраныысса таһыттан тиийэ сакаастаан ылаллар эбит.
«Билиҥҥи кэмҥэ дьон-сэргэ Россия табаарын хаачыстыбалаах диэн сыаналыыр буоллулар. Хомойуох иһин, Дьокуускайга оҕо таҥаһын тигэр фабрика суох. Кыра сыахтар бааллар, ол эрээри саҥа саҕалаан эрэр дизайнердар таҥастарын ылбаттар. Ол иһин Новосибирскай фабрикаларын кытта үлэлиибит. Дьыалабытын сайыннарар туһуттан Санкт-Петербург куоракка олорон эрэ үлэлиибит. Улахан куораттар уопуттарыгар үөрэнэн, билиибитин хаҥатан, инникитин Дьокуускайга, Бэрдьигэстээххэ үлэлиир баҕа санаалаахпыт. Дьиэ кэргэммит дьарыгар бириэмэбитин барытын кэриэтэ аныыбыт. Элбэхтик иистэнэбин, кинигэ ааҕабын, интэриниэтинэн атыыны баһылыырга дьулуһабын.»- диир Снежана уонна муода эйгэтигэр үлэлиэн баҕалаахтарга баҕа санааҕытыттан хаһан даҕаны аккаастаммакытыгар, бэйэҕитигэр эрэнэ үөрэнэргитигэр, олус ба5ардахха, тулуурдаахтык ылсан туран үлэлэстэххэ хайаан да барыта табыллар диэн элбэхтэн биир холобурунан буолар.
«Мин бизнеhим» Киин Горнай улууьугар туспа тутар салаатын салайааччыта,
Попова Марианна