Амматааҕы киин бибилэтиэкэҕэ «Ыҥырыаны иитии кистэлэҥнэрэ» диэн төгүрүк остуол буолан ааста. Тэрээһини Дьокуускайдааҕы тыа хаһаайыстыбатын техникумун эбии үөрэхтээһиҥҥэ педагога Марфа Дмитриева салайан ыытта.
Кэнники сылга Амма улууһугар мүөттээх ыҥырыанан дьарыктанааччылар ахсааннара элбээн иһэр. Маныаха уопуттаах дьоннортон сүбэ ылыы олус наадалаах. Манан сиэттэрэн Дьокуускайдааҕы тыа хаһаайыстыбатын техникумун эбии үөрэхтээһиҥҥэ педагога Марфа Дмитриева дьарыктаныан баҕарааччыларга уонна бу дьыалаҕа ылсан үлэлии сылдьар дьоҥҥо анаан “Ыҥырыаны иитии кистэлэҥнэрэ” диэн “төгүрүк остуолу” тэрийэн ыытта. Тэрээһин В.М. Новиков-Күннүк Уурастыырап аатынан кииннэммит бибилэтиэкэҕэ буолла. Тэрээһиҥҥэ урбаанньыт, Амма улууһун тигээйи тутааччыларын куратора Марат Залялов кыттыыны ылла уонна үлэтин уопутун кэпсээтэ, сүбэлэри биэрдэ. Ону сэргэ олохтоох тигээйи иитээччилэр Ассоциацияларын салайааччыта Эльвира Пестерева иһитиннэрии оҥордо. Тэрээһиҥҥэ кинигэ, хаһыат ыстатыйаларын, бу салааҕа туттуллар маллар, инструменнар быыстапкалара туран мустубут дьон сэҥээриитин ылла. Көрсүһүүгэ Бөтүҥ нэһилиэгин баһылыга Саргылана Борисова, улуустааҕы тыа хаһаайыстыбатын управлениетын кылаабынай зоотехнига Айтал Фомин кытыннылар. Мустубут дьон инники үлэ былаанын торумнастылар.