Бу күннэргэ Амма улууһугар өрөспүүбүлүкэ ыраах айаҥҥа сылдьар суоппардарын сүлүөтэ буолан ааспыта. Бэлиэ күн чэрчитинэн улуустааҕы суоппардар федерациялара уонна “Автоледилар” түмсүүлэрэ «Биисинэс-инкубатор» салалтатыгар дириҥ махталларын биллэрэн туран, 50 000 солкуобайы уу харчынан туттардылар.
Амма улууһун суоппардарын федерациятын бэрэссэдээтэлэ Николай Акимов хомуллубут көмөнү, 50 000 солкуобайы “Биисинэс-инкубатор” дириэктэригэр Николай Афанасьевка туттарда. Түмсүүлэр бэрэстэбиитэллэрэ этэллэринэн, бу көмө өрөспүүбүлүкэтээҕи ыраах айаҥҥа сылдьар суоппардарын сүлүөтэ үрдүк таһымнаахтык ааспытыгар улуус урбаанньыттарын салалтата бэйэтин кылаатын киллэрбитигэр махтал бэлиэтэ буолар. Ол курдук суоппардар бэйэлэрин Махтал суруктарыгар «Эһиги өйөбүлгүт биһиэхэ саҥа күүһү-уоҕу угар, былааннарбытын олоххо киллэрэрбитигэр бигэ тирэх буолар. Бу үп дойдулаахтарбытыгар, ордук урбаан эйгэтигэр, саҥа эркээйини, эрэли биэрдин» диэн бэлиэтээтилэр. Улуус урбаанньыттарын өйүүр структуралар маннык үтүө бачыымы көҕүлүүллэрэ инники көлүөнэ урбаанньыттарыгар үтүө холобур буолуоҕа. Түмсүүлэр кэлэктиипкэ айымньылаах үлэни, доруобуйаны уонна ситиһиилэри баҕардылар.