Фроҥҥа сылдьан кэлэн баран, байыаннай дьайыы бэтэрээнэ Юрий Слепцов иннигэр эйэлээх олоххо хайдах миэстэбин булабын диэн толкуй киирбитэ.
Кини онно хоруйу Дьокуускайга баар «Аҕа дойдуну көмүскээччилэр» судаарыстыбаннай пуонда филиалыгар тиийэн булбута. Бэтэрээн социальнай координаторынан Елена Бережнова анаммыта. Бэтэрээни тус арыаллааһын чэрчитинэн наадалаах мэдиссиинэ көмөтүн уонна доруобуйатын чөлүгэр түһэриини тэрийбиттэрэ, ону таһынан байыаннай дьайыы кыттыылаахтарыгар барыларыгар аналлаах өйөбүлү оҥорбуттара.
2026 сыл кулун тутар ыйыгар Юрий социальнай хантараак туһунан консультация ыла кэлбитэ, пуонда филиалыттан үтүө сүбэни ылбыта, биисинэс бырайыагын ситиһиилээхтик көмүскээбитэ уонна социальнай хантараагы түһэрсибитэ. Бэриллибит үбүнэн-харчынан бэтэрээн ленточнай пилорама атыыласпыта. Билигин Саха сирин олохтооҕо нэһилиэнньэҕэ былаахы уонна буруус маһы оҥорон таһаарар – бу дьыала дохуоту эрэ буолбакка, ону тэҥэ үлэттэн дуоһуйууну биэрэр.
Бэтэрээн бэйэтэ этэринэн, пуонда филиала киниэхэ суолталаах тирэх буолбут: «Мин 2023 сыллаахха пуонда Саха сиринээҕи филиалыгар тиийэн көрдөспүтүм. Ол кэмтэн ыла биһиги улахан өйөбүлү ылабыт. Пуонда көмөтүнэн биһиги, бэтэрээннэр, өрөспүүбүлүкэбитигэр уонна бүтүн дойду үрдүнэн буола турара быһыыны-майгыны билэ-көрө олоробут. Саамай тыын боппуруостарбытын «Аҕа дойдуну көмүскээччилэр» пуондаларын нөҥүө быһаарабыт. Онон биһиги, байыаннай дьайыы бэтэрээннэрэ, социальнай координатордарбытыгар уонна пуонда бары үлэһиттэригэр улаханнык махтанабыт! Кинилэргэ үтүөнү, доруобуйаны уонна тус олохторугар дьолу-соргуну баҕарабыт!».
Юрий Николаевич олоҕо үлэнэн эрэ муҥурдаммат. Кини – дьэ кэргэн кыһамньалаах аҕата уонна эһэтэ, ону тэҥэ пуонда филиала ыытар элбэх тэрээһиннэригэр көхтөөх кыттааччыта. Иллэҥ кэмигэр бэтэрээн муусуканан дьарыктанар.
Юрий Слепцов бойобуой суола 2022 сылтан саҕаламмыта, кини байыаннай дьайыы зонатыгар бэйэтэ баҕа өттүнэн барарга быһаарыммыта. Казачьай полка баҕа өттүнэн барааччыларын тэрээһин разведкатыгар сулууспалаабыта, оттон 2025-2026 сылларга иккиһин инники кирбиигэ барбыта, пехотнай подразделениеҕа анаммыта.
Санатан эттэххэ, социальнай хантараагы байыаннай дьайыы бэтэрээннэрэ, кинилэр кэргэттэрэ, ол иһигэр I эбэтэр II группалаах инбэлииттээх бэтэрээннэр түһэрсиэхтэрин сөп. Сайабылыанньа биэрэргэ Дьокуускайга «Аҕа дойдуну көмүскээччилэр» пуонда филиалыгар тиийиэххэ наада, онно исписэлиистэр докумуоннарын ылыахтара, консультация ыытыахтара уонна сүбэ-ама биэриэхтэрэ. Ол кэнниттэн сайабылыанньа биэрээччи докумуоннарын социальнай көмүскэл уорганыгар ыытар. Бүтэһиктээх быһаарыыны биэдэмэстибэлэр икки ардыларынааҕы хамыыһыйа ылар. Наада буоллаҕына биисинэс-былааны бэлэмнээһиҥҥэ көмөнү «Мин биисинэһим» киин исписэлиистэрэ оҥоруохтара.