Быйыл Амма улууһугар биллэриллибит Тыа хаһаайыстыбатын сылын чэрчитинэн улуус баһылыга агро хайысхалаах үөрэх тэрилтэлэригэр анаан Грант олохтообута. Маныаха агротехнологическай хайысхалаах үөрэх тэрилтэлэрэ, оскуолалар, эбии үөрэхтээһин киинэ кыттыыны ылан Грант иһин кииристилэр.
Грант күрэҕэр кыттыыны А.Е. Кралин аатынан Абаҕа, В.Г. Короленко аатынан Амма 1№-дээх, Н.Е. Иванов аатынан Бөтүҥ, П.И. Караканов аатынан Мээндиги, Е. В. Чистяков аатынан Майскай агро хайысхалаах оскуолалара уонна Амматааҕы эдэр натуралистар станциялара ыллылар. Грант пуондатына сууммата – 500 000 солкуобай. Харчы агро араас хайысхатыгар — матырыйаалынай-техническэй базаны сайыннарыыга, үүнүүнү, тыа хаһаайыстыбатын бородууксуйатын оҥорон таһаарыыны үрдэтиигэ аналлаах бырайыактары олоххо киллэриигэ, ону таһынан үөрэнээччилэри аграрнай идэлэргэ салайыыга туттуллуох. Улуус баһылыга Степан Кузьмин салалтатынан анал хамыыһыйата, бырайыактары бигэргэтиллибит быраабыланан сыаналаата.
Ол курдук бырайыак улууска уонна өрөспүүбүлүкэҕэ наадалааҕа, үөрэнээччилэр практическай агро дьарыктарга кыттыылара (бары үөрэнээччилэртэн 70% кыраан аҕыйаҕа буолбатах), саҥаны айыы уонна саҥа технологиялар туһаныллыылара, смета уонна былаан олоххо толоруллар кыахтара, бырайыак туруктааҕа уонна атын оскуолаларга тарҕанар кыаҕа, социальнай хайысхата, презентация уонна көмүскэл хаачыстыбата көрүлүннэ. Кыттааччылар хамыыһыйа иннигэр бэйэлэрин үлэлэрин көмүскээтилэр.
Түмүккэ кыайыылааҕынан П.И. Караканов аатынан агро хайысхалаах оскуола сүөһүлэрин тутар хотон тутуутун туһунан киллэрэн, кыайыылаах таҕыста уонна 500 000 солк наҕараадаланна. Онон оскуола бырайыагын 2026 сыл бүтүөр диэри толорорго, үөрэнээччилэртэн 70% практическай агродьарыктарга кытыннарарга, атын үөрэх тэрилтэлэригэр анал тэрээһиннэри ыытарга уонна түмүктүүр бэлиэтээһин фотоларынан, видеоматырыйаалларынан бигэргэтиэхтээх. Амма улууһун үөрэҕин салалтатын бэлиэтээһининэн, бу күрэх оскуолаларга агроүөрэхтээһин сайдарыгар, тыа хаһаайыстыбатын үлэтигэр көҕүлүүргэ уонна саҥа агротехнологиялары үөрэх хаамыытыыгар киллэриигэ улахан хамсааһын буолла. Кыайыылаахтарга үөрэх уонна тыа хаһаайыстыбатын салалтата бырайыактар олоххо киириилэригэр күүс-көмө, сүбэ-ама буолуохтара. Күрэх түмүгүнэн, улууспутугар агро үөрэхтээһин салгыы сайдар суолларын тобулар сыалтан, үөрэх уонна тыа хаһаайыстыбатын салалталарынан хамыыһыйа тэриллэн, концепция суруллан бу сыл бүтүөр диэри улуус дьокутааттарын көрүүтүгэр киллэрэргэ диэн сүбэлэстибит.
«Улууспутугар биллэриллибит Тыа хаһаайыстыбатын сыла – бу агро хайысханан үлэлиир оскуолалар үөрэнээччилэри хайдах бэлэмнииллэрин сыаналыырга эмиэ тоҕоостоох. Онон төһө кыах баарынан салгыы граннары олохтоон, ол граннар хайдах олоххо киирэллэрин көрүөхпүт. Билигин Мээндиги оскуолата бырыйыагын олоххо киллэриитин хонтуруоллуохпут. Барыта табыллан үчүгэйдик үлэлээтэҕинэ, оскуола бэйэтин кэтэх хаһаайыстыбата сайдыахтаах. Бырайыактар оскуолаларга бэйэ бородууксуйатын туһанан оҕолор доруобуйаларын тупсарыыга төһүү буолуохтара диэн эрэнэбит, – диэн улуус баһылыга Степан Николаевич күрэх түмүгүнэн санаатын үллэһиннэ.
Кыайыылаах, Мээндиги оскуолатын истиҥник эҕэрдэлиибит, бырайыактарын ситиһиилээхтик толороллоругар баҕарабыт!