Амма нэһилиэгин “Бизнес- инкубатор” дьиэтигэр «Дорҕоончук» логопедическай кабинет үөрүүлээхтик арыллар бэлиэ түгэнэ буолла. Бу билиҥҥи кэмҥэ олус наадалаах кабинет арыллан оҕолорбут сөптөөхтүк саҥаралларыгар күүс-көмө буолуо.
Бу үтүө саҕалааһын улууспут дьонугар-сэргэтигэр улахан кэскили аһар, олус наадалаах киин буолар. Кабинеты бэйэ дьарыктаах, дьулуурдаах, анал үөрэхтээх Матрена Драгунова аста. Кини сыралаах үлэтинэн, ыраас санаатынан оҕолорбут уонна улахан дьон тыл сайдыытыгар туһуламмыт саҥа эйгэни тэрийдэ. Тэрээһиҥҥэ ыҥырыылаах ыалдьыттарынан СӨ реабилитационнай “СУВАГ” киинин биллиилээх логопед-рефлектолога Наталья Кребс уонна Мэҥэ Хаҥалас улууһун реабилитационнай киинин логопеда Елена Титова буоллулар, дьоһуннаах эҕэрдэ тылларын эттилэр. Ону сэргэ эҕэрдэ тылларын Амма улууһун дьаһалтатын аатыттан Григорий Карпов, Амма нэһилиэгин баһылыга Михаил Артемьев, «Мин биисинэһим» киин салайааччыта Александра Николаева, «Кэнчээри», «Хатыҥчаана» уһуйаан иитээччилэрэ, Матрена Васильевна бииргэ төрөөбүттэрэ, бииргэ үөрэммит доҕотторо тириэртилэр, кабинет билиҥҥи кэмҥэ ураты суолталааҕын ыйдылар. Саҥа арыллыбыт кабинеты Амма нэһилиэгин Айыы дьиэтин салайааччыта Василий Кочаткин алгыстаата, кэлбит ыалдьыттар үтүө санааларын тириэрдэн салама ыйаатылар.