Кэбэргэнэҕэ 19 тн 200 киилэ от тиэйиилээх 2 массыына кэлэн олохтоохтор үөрүүлэрэ улахан.
300-түү киилэлээх рулоннаах оттору Чурапчы улууһун Хадаар нэһилиэгиттэн Андросов Афанасий Иннокентивичтан атыыласпыттар. Тиэйиитин ИП Жиркова Е.Ю. дьаһайан, суоппар Апросимов Евгений Евгеньевич тиэйэн аҕалбыт. Кинилэргэ нэһилиэнньэ махтала улахан.
Баһылык Иван Атласов республика тыатын хаһаайыстыбатын миниистирин солбуйааччытыгар Афанасьев Николай Степановичка, улуус баһылыгар Новиков Владимир Вадимовичка, тыа хаһаайыстыбатын управлениетын начальнигар Черемкина Анисия Николаевнаҕа, Майыар нэһилиэгин тыатын хаһаайыстыбатын специалиһыгар Аргунов Алексей Алексеевичка махтанар.
«Сылгылары туруктарынан көрөн эбии аһылыкка киллэртиибит. Онон туруктара ама. Кыстык ыарахана биллэрэн эрэр. Хаар халыҥ. Типпит сирдэринэн сылгы кыайан хаспат. Ходуһаларга, күөл кытыытынан хаар халыҥа 80 см тиийэр. Сарсын 9 тоннаттан тахса эбиэс, комбикорм, туус кэлиэхтээх», — диэн тыа хаһаайыстыбатын исписэлииһэ Алексей Аргунов иһитиннэрэр.