Үөһээ Бүлүү улууһун Сургуулук нэһилиэгэр «Кыра кыамталаах хотону тутуу, өрөмүөннээһин, модернизациялааһын» тыа хаһаайыстыбатын бырагыраамматынан саҥа хотон тутуллан үлэҕэ киирдэ.
СХПОК «СУРГУУЛУК» 2021 сыл алтынньы 25 күнүттэн тэриллэн үлэлиир. Хаһаайыстыба салайааччыта Александр Федорович Степанов кэргэнин Чена Васильевна Степанованы кытта 2021 сылга 21 төбө сүөһүттэн хаһаайыстыбаларын арынан үлэлээн билигин 56 төбө сүөһүгэ диэри кэҥээтилэр. Быйыл 20 ыанар ынахтаахтар.
2025 сылга 41 тонна 600 киилэ үүккэ Сөбүлэҥ түһэрсибиттэр. Билиҥҥи туругунан 40 тонна 11 киилэ үүт туттардылар.
2025 сылтан тыа хаһаайыстыбатын сайыннарыыга анаммыт судаарыстыбаннай боломуочуйалар улуустарга бэриллибиттэрэ. Бу саҥа механизымынан хотон, сайылык, сылгы баазатын тутуутугар, өрөмүөнүгэр, модернизациятыгар улууска өрөспүүбүлүкэттэн көрүллүбүт үптэн 24 мөл. 755 тыһ. солкуобайы уурбуппут.
Конкуруһу ааспыт үрдүк көрдөрүүлээх 3 хаһаайыстыбаларга бу үптэн «Булгунняхтах» тэриллиилээх хаһаайыстыбаҕа, «Сайдыы» СХПК-ҕа уонна «Сургуулук» СХПОК-ка кыра кыамталаах хотону тутууга өйөбүл бэриллибитэ. «Сургуулук» СХПОК-ка кыра кыамталаах хотону тутууга өрөспүүбүлүкэ бүддьүөтүттэн барыта 9 мөл. 556 тыһ. солкуобай, ол иһигэр 6 мөл. 187 тыһ. солкуобай тутуу үлэтигэр, 2 мөл. 500 тыһ. солкуобай оборудованияннан хааччыйыыга көрүллэн, манна эбии хаһаайыстыба 868 тыһ. солкуобайы бэйэтэ эбэн 50 төбө батар хотоно тутулунна.
Сургуулук нэһилиэгэ үүткэ Үөһээ Бүлүү улууһун үрдүнэн саамай үрдүк көрдөрүүлээх нэһилиэк буолар. Нэһилиэккэ 632 төбө сүөһү, ол иһигэр 199 ыанар ынах баар. Быйылгы үүт былаана 249,5 тонна эбит буоллаҕына, былаан 72,8% туолан 181,67 тонна үүтү туттардылар. Маны таһынан, Сургуулуктааҕы маслоцех быйыл 12 тонна 135 киилэ сүөгэй, 7 тонна 290 киилэ арыы оҥорон таһаарда.
#СельскоеХозяйство
#ВерхневилюйскийУлус