Амма улууһун тимир уустарын түмсүүтүн салайааччыта Роман Алексеев, уустар Александр Карамзин, Альберт Фомин уонна Эмистэн төрүттээх Александр Михайлов Бүтүн Арассыыйатааҕы 51-с төгүлүн ыытыллар “Клинок — 2025” быыстапкаҕа кытта сылдьаллар. Роман Александрович билиһиннэрбитинэн Саха сириттэн уопсайа 14 уус кыттар. Ол курдук Үөһээ Бүлүү, Хаҥалас, Нам, Мэҥэ Хаҥалас, Үөһээ Дьааҥы, Амма улуустарыттан уонна Дьокуускайтан тиийдилэр.
“Бэҕэһээ Москубаҕа, Кремльтэн 4 км сиргэ турар Дубровка диэн сиргэ тимир уһаарыыта буолла. Манна биһиги аммалар Болугур нэһилиэгин сырдык учаастагыттан ылыллыбыт руданы уһаардыбыт. Онно 31 киилэттэн 7 киилэ болгуо таһааран үөрүү-көтүү буоллубут. Бу күн уустары көрсө Саха сирин сенатора Сахамин Миланович Афанасьев кэлэн барда. Уус уолаттары, ювелир кыргыттары эҕэрдэлээтэ уонна “саха буоларбынан өссө төгүл киэн тутуннум” диэн эттэ.
Маны тэҥэ быйыл сайын Аммаҕа кэлэн барбыт Лев Толстой хос сиэнэ Владимир Толстой кэлэн эмиэ көрсөн барда. Доҕоро, Судаарыстыбаннай Дума дьокутаата, култуура сис кэмитиэтин солбуйааччы бэрэссэдээтэлэ Александр Михайлович Шолоховы илдьэ кэлбит. Биһиги ыалдьыттарбытыгар Сахамин Милановичка уонна Александр Шолоховка хатат бэлэхтээтибит. Судаарыстыбаннай Дума дьокутаата сахалар тимир уһаарыыларын судаарыстыбаннай нэһилиэстибэ реестрыгар киллэрэргэ үлэлэһиэм диэн биһиги этиибитин өйөөбүтүттэн бэркэ астынныбыт” диэн Роман Александрович сырдатта.
Сиһилии бу сырыы туһунан өссө кэпсиэхпит. Хаартыскалары уонна видеону Роман Алексеев тиксэрдэ