Бу эйгэҕэ саҥа үлэлээн саҕалаабыт Уолбут нэһилиэгиттэн урбаанньыт дьиэ кэргэн аҕа баһылыга Владимир Малашкин бэйэтин үлэтин, улууспутугар урбаан эйгэтин сайыннарарга бэйэтин көрүүлэрин этиилэрин кытта туох кыһалҕа баарын үллэһиннэ.
Бары билэрбит курдук Владимир дьиэ кэргэнинэн 2022 сылтан сылгы иитиитинэн ылсан дьарыктанар. Бастакы хардыыларын Орто Халыма улууһун Өлөөкө Күөлүн сылгы собуотуттан Өрөспүүбүлүкэ 100 сылын туолуутугар анаан, иккис сырыытын быйыл, Кыайыы 80 сылыгар уонна улуус тэриллибитэ 95 сылыгар анаабыттарын сырдатан турабыт. Үс сыллаах үлэ түмүгэр хаһаайыстыба билигин 240 төбө сыспай сиэллээҕи иитэр. Быйыл сайын 180 т. от оттоммут.
Владимир урбаан эйгэтигэр сылгы иитиитин талбыт биричиинэлэрин маннык быһаарар:
— Биһиги сирбит-уоппут сылгы иитиитигэр олус табыгастаах. Оҥордоххо, киэҥ-куоҥ оттуур ходуһа, мэччийэр сир таһаарыахха сөп. Саха сылгыта – айылҕа оҕото, аһын бэйэтэ булунар, ол да буоллар син биир төрүүр-ууһуур кэмигэр, үүнүүтэ суох биитэр халыҥ хаардаах кыһын эбии аһатары бары да билэбит. Сөптөөхтүк салайынан үлэлээтэххэ, ханнык да баҕа санааны олоххо киллэриэххэ сөп. Ол да буоллар араас мэһэйдэр, харгыстар ханна барыахтарай… Мин ааспыт сылга республикабыт салалтатын отчуоттуур мунньаҕар, ону таһынан улууспут аатыттан Майаҕа буолбут Социалистическай Үлэ Дьоруойа Афанасий Егорович Степанов 105 сылыгар ананан ыытыллыбыт сылгыһыттар республиканскай слеттарыгар даҕаны хоту сиргэ сылгыны иитии уратыларын, ордук туох кыһалҕалары көрсөрбүтүн аһаҕастык сырдатан турабын. Сылгыны иитиигэ, бастатан туран, адьырҕа кыыл кутталлаах. Тыатааҕыттан көмүскэнэргэ, сылгыбытын-сүөһүбүтүн көмүскүүргэ (сылгыны эрэ буолбакка, үлэһит да дьон көмүскэнэригэр) билиҥҥитэ олус уустук, элбэх хаарчах баар. Тайҕа быыһыгар базалаах буоламмыт, биһиэхэ бу сытыы боппуруос. Бу күһүн тыатааҕылар сырыыларыттан үгүс үлэ-сыра халтайга хаалла, улахан ороскуот буолла. Бу боппуруос түргэн соҕустук быһаарылларын олус күүтэбит. Быйыл республика үрдүнэн ханна да тыатааҕы элбээбитэ билиннэ, онон суһал соҕустук быһаарыллар ини диэн эрэнэбит.
Иккиһинэн, сылгы иитиитэ айылҕаттан олус тутулуктаах. Үөһээ этиллибит мунньахтарга халыҥ хаардаах кыһыннар улахан хоромньуну таһааралларын эмиэ этэн турабын. Быйылгы хаарбыт эрдэлээтэ, өссө да эбии түһүө турдаҕа. Маныаха биһиги эрдэттэн бэлэмнээх буолуохтаахпыт. Манна сыһыаран эттэххэ, быйыл бэйэм кыахпынан ДТ — 75 трактор, суол үктүүргэ анаан трактор хаар күрдьэр отвалын, МТЛБ вездеход отвалын ылынным, маны таһынан оттуурга табыгастааҕынан бэйэтин көрдөрбүт Кытай дьоҕус тракторын ыллым. Хоту сиргэ бэлэмнэнии үлэтин аҥардас биир киһи кыайбат. Эбии аһылык, техника аҕалыыта буоллун — бары түмсэн, көмөлөөн үлэлиэхтээхпит. Оччоҕо эрэ үлэ тахсыылаах үчүгэй түмүктээх, оччоҕо эрэ улууспут сайдыылаах буолуоҕа. Манна улууспут салалтата, тустаах министерстволар, депутаттар, республика салалтата сүрүн тирэх буолаллар.
Түмүкпэр, улууспут урбаанньыттарын идэлээх күммүтүнэн эҕэрдэлиибин. Тулууру, дьулууру уонна үтүө түмүктээх үлэни баҕарабын. Тустаах күҥҥэ күүс-көмө буолар дьоммут болҕомтолорунан биир эмэ кыһалҕалаах тыын боппуруос быһаарылларыгар баҕарабын – диэн инникигэ эрэнэр санаатын хаһыат нөҥүө сыһыаннаах дьоҥҥо туһаайар.
Кырдьыга да, барыбыт олохпут таһыма, күннээҕи аһыыр аспыт, таҥнар таҥаспыт урбаанньыттартан тутулуктааҕын билэбит. Кинилэр иннилэригэр ардыгар олус уустук, соҕотох киһи быһаарбат соруктара күөрэйэллэрэ мөккүөр буолбатах. Онон кинилэргэ сөптөөх өйөбүл баар буоларыгар эмиэ эрэнэбит.