Москуба уонна Санкт-Петербург куораттар олохтоохторугар, ыалдьыттарыгар Амма улууһа саха норуотун үгэстэрин, култууратын киэҥник билиһиннэрэн кэллэ. Ыытыллыбыт бары тэрээһиннэргэ сылдьыбыт дьон бэйэлэригэр Саха сирин туһунан элбэҕи иҥэринэн бардылар. Ыытыллыбыт маастар- кылаастарга оҕолор кытта сылдьан бэркэ астыннылар. Тарбаҕар талааннаах Амма нэһилиэгин олохтооҕо Анна Килбясова- Айылҕаана Оһуордаах маастар кылааһыгар минньигэс дьэдьэннээх тууйаһы уонна алгыстаах чүмэчини оҥорторон сэҥээриини ылла. Илдьибит оҥоһуктара бэрт хамаҕатык атыыга бардылар.
“Мин бастатан туран миигин улууспут элбэх дьоҕурдаах, талааннаах дьон быыһыттан таба көрөн, дойдубут тэбэр сүрэҕэр Москуба уонна Санкт-Петербург куораттарыгар маастар-кылаас ыытарбар эрэнэн ынырбыттарыгар “Мин биисинэһим” киин салайааччытыгар Александра Михайловна Николаеваҕа, Амма улууһун баһылыгын солбуйааччытыгар Ньургуйаана Ивановна Илларионоваҕа барҕа махталбын тиэрдиэхпин баҕарабын. Бу ыҥырыы көмөтүнэн оҥоһуктарбын киэҥ эйгэҕэ билиһиннэрэр кыахтанным, уопут да ыллым. Маастар-кылаас ыытарбар биир ый инниттэн бэлэмнэнэн тупса сахалыы тыыннаах, Аммабыт минньигэс дьэдьэнин, Аммабыт күндү чөмчүүгүн -Сардааналаан, ыаҕыйаны дьиҥнээх ситии быалаан ураты хартыынаны толкуйдаабытым. Бэлэм текстурнай паастанан макет онорбутум. Москубаҕа маастар-кылааспыт Зарядье паарка иһигэр баар сырдык, киэҥ-куоҥ “Медиацентр” иһигэр буолбута.
Бастаан хайдах эрэ 45 мүнүүтэ иһигэр уруһуйдаан бүтэриэхтэрэ дуо диэн долгуйа санаабытым. Хата кыттааччыларым болдьоммут бириэмэҕэ уруһуйдарын астына-дуоһуйа кырааскалаан бүтэрбиттэрэ. Туораттан дьон көрөн “мантан киэһээ өссө маастар- кылаас буолар дуо, сарсын оҥороҕут дуу” диэн ыйытыы бөҕө буолбуттара. Дьон сэҥээрбиттэриттэн бэйэм да астынным, дуоһуйдум даҕаны. Өссө бу маастар-кылааспар биир дойдулаахпыт, Амма нэһилиэгин баһылыгын солбуйааччытынан өр сыл үлэлээбит убаастыыр киһибит Людмила Петровна Васильева кэлэн кыттан туспа улахан үөрүү этэ.
Онтон Санкт — Петербург куоракка маастар-кылаас Сампсониевскай саадка ыһыахпыт кэмигэр буолбута. Онно Алгыстаах Аммабыт отторун туһанан “Бэйэ баҕа санаа чүмэчитин” оноттордум. Үгүс киһи сылдьан иһиттилэр, интэриэһиргээтилэр, сэҥээрдилэр. “Бэйэ баҕа санаа чүмэчитин” кытта алгыстаах открыткабын, бэйэм онорбут оноһукпун бэлэх ууннум. Манна өссө каменнай гипсэнэн онорбут оноһуктарбын атыыга илдьэ барбытым, хамаҕатык ыллылар, тас-дойдуга тиийэ илдьэ бардылар. Арассыыйа Географическай уопсастыбата ыытар “Арассыыйа дьиктилэрэ” диэн фестивалын чэрчитинэн Москубаҕа уонна Санкт-Петербурга кытыыны ылар, долгутуулаах даҕаны, дойдубар, улууспар эппиэтинэстээх даҕаны буолар. Онон маннык далааһыннаах тэрээһиҥҥэ кыттыыны ылбыппынан киэн туттабын”, — диэн этэр Анна Килбясова- Айлыҕаана Оһуордаах.
Манна даҕатан эттэххэ, Айылҕаана Аммаҕа ыытар маастар-кылаастарыгар эмиэ үгүс киһи сылдьан бэйэлэригэр кэрэ оҥоһуктары илдьэ бараллар. «өссө араас дьикти, кэрэ оҥоһуктары толкуйдаан маастар кылаастары ыытыам» диэн этэр Айылҕаана.