Билигин туох баар оҥорон таһаа­рыы барыта урбаан эйгэтигэр бэриллибитинэн, бу ха­йысха олохпут-дьаһахпыт тутаах салаата буолла. Ол курдук эн сүөһү ииттэн бааһынай хаһаайыстыба буол, аһы-үөлү атыы­лаан маҕаһыыннанарыҥ, оччоҕо урбаанньыт дэнэҕин. Биһиги улууспутугар урбаан эмиэ араас ха­йысхата баар. Ол эрээри, ылан көрдөххө, сүрүннээн сүөһү ииттэллэр, ас-үөл атыылыыллар, миэбэл оҥороллор, сэбэрэни тупсараллар, о.д.а. Кэлиҥҥи кэмҥэ дьону дьарыктаах оҥорор социальнай хантараах быһыытынан үп-харчы көрөр буоллулар. Ол иһин оннук хантараагынан бэйэлэрин дьыалаларын сонун хайысханан саҕалаан эрээччилэри булан туоһуластыбыт:

Кирилл Афанасьев, Түүлээх нэһилиэгин олохтооҕо:

– Кылаайы бөһүөлэгэ Ал­­дан өрүс кытылыгар сытар. Араас таас үрэхтэр, тукулааннар элбэхтэр. Ол иһин туризмынан дьарык­танарга олус табы­гастаах дии санааммын дьон са­йыҥҥы сынньалаҥын тэри­йэр баҕалаахпын. Бөһүөлэктэн 20-чэ км тэйиччи сиргэ илдьэн спининынан, күөгүнэн балыктатабын. Сүрүн сыала оннук. Хонуктаах буолар. Үүтээҥҥэ эбэтэр палаткаҕа хоно сытыахтарын сөп. Онно тиийбит киһи балыктаабакка, көннөрү сынньаныан эрэ эмиэ сөп.

Билигин миэхэ күүстээх уу мотуора наада. Ол иһин соцхантараахпар ону атыылаһарбар үп наадатын эппитим. Мотуорум бу күннэргэ кэлэрин кэтэһэбин. Сынньана, балыктыы кэлээччилэр сайаапкаларын хайыы үйэ түһэрэн эрэллэр. Түүлээххэ кэлэргэ сайын суол суох. Онон туристар Чэриктэйгэ кэлэллэр, оччоҕо мин утары баран ылан сынньанар, балыктыыр сирдэригэр илдьэн биэрэбин. Аныгы мотуор­дар олус күүстээх буолан, айаҥҥа элбэх чааһы бараабаккын.

Сардаана Жиркова, I Өспөх нэһилиэгин олохтооҕо:

– Урбаан эйгэтигэр аһы-үөлү атыылааһынынан дьарыктанабын. Онно бэлиэтии көрдөхпүнэ, са­йыҥҥы куйаас күннэргэ мороженай олус хамаҕатык барар эбит. Ол иһин бэйэбитигэр мороженай оҥо­рон атыылыахха сөп эбит диэммин соц.хантаараахпар ону оҥорор тэрил атыылаһарбар харчы наадатын эппитим. Аппарааппын сакаастаан олоробун, бу күннэргэ кэллэр эрэ, мороженай оҥорон саҕалаабытынан барыахпыт. Билигин араас ингредиент элбэх, онон табыллыа дии саныыбын.

Кларита, Дмитрий Шелковниковтар, Мүрү нэһилиэгин олохтоохторо:

– Оҕо сынньалаҥын тэрийэр сыалтан бэйэбит бырайыак оҥорон, 2024 сыл сааһыгар соц. хантараак баттаспыппыт. Онно дьыалатын-куолутун толорорбутугар Мүрү нэһилиэгин дьаһалтата, чуолаан баһылыгы солбуйааччы Вероника Сивцева көмөлөспүтэ. Хантараагынан 330 тыһыынчаны ылбыппыт.

Соцхантараак ситиһэр уустуга суох, кумааҕыны кыайа ту­туох­ха наада эбит. Барытын кэмигэр хомуйан, толорон истэххэ судургу. Хантараак харчытынан Чита куораттан официальнай поставщиктан улахан үрдэриллэр батут сакаас­таа­быппыт, ирдэбилгэ эппиэттиир туох баар сертификата баар. Бэйэ­бит харчы эбэн саахартан баата оҥорор уонна попкорн оҥорор аппарааты ылбыппыт. Былырыын ыһыах саҕана батуппут сатаан кэлбэккэ, саахартан баата уонна попкорн оҥорон уонча ыһыаҕы кэри­йэн атыылаабыппыт. Оттон батуппут кэлбитигэр араас бырааһынньыктарга күһүн хойукка диэри туруорбуппут.

Быйыл эмиэ батуппутун, саахартан баата, попкорн оҥорор аппарааттарбытын илдьэ ыһыахтары кэрийиэхпит. Батуту нэһилиэкпит иһигэр уонна аттынааҕы нэһилиэктэргэ дьоҥҥо уларсабыт. Былырыын бортовой массыына арендалаһан таспыппыт, быйыл прицеп ылынныбыт, онон хайа да нэһилиэккэ тиэрдэр кыахтанныбыт. Оҕо төрөөбүт күнүгэр, өрөбүл күннэргэ, холобур, ыалынан кыттыһан оҕолорун сэргэхситээри уларсаллар. Батут баар буол­лаҕына, быраа­һынньыктарга оҕону тугунан аралдьытабыт диэн ыйытыы турбат, бэйэ­лэрэ оонньууллар.

Источник