Нам улууһугар уопсастыбаннай аһылык уонна туризм, ыалдьытымсах буолуу Ассоциациятыттан сервискэ сертифицированнай эксперт Сардаана Григорьева үлэлиир.
Намҥа кафелар, дьону аһынан хааччыйар дьиэлэр таһымнара үрдүүллэригэр “Мой Бизнес” киин сэбиэдиссэйэ Марфа Тарабукина ыҥырыытынан, Нам урбаанньыттарыгар практическай семинар буолла.
Туризм, ыалдьыттары көрсүү, аһылык сибээстээх. Саха сиригэр ыалдьыттыы кэлээччи булгуччу Саха норуотун аһын боруобалыахтааҕа этиллэр.
Ол курдук, бүгүҥҥү күҥҥэ гостиницаларга, банкетнай саалаларга саха аһылыгын киллэрии үлэтэ утумнаахтык ыытылларын эксперт Сардаана Вячеславовна этэр.
Официант сакаастаабыт киһиэхэ астаах иһити хайдах быһыылаахтык тутан тиэрдиэхтээҕин эксперт быһаарда.
“100 миэстэлээх аһыыр сиргэ ортотунан 300 иһит баар буолуохтаах” — диир Сардаана Вячеславовна.
Маны этэн туран, киһи сынньанар сөптөөх сирдэргэ, кафеларга, рестораннарга, холобура, Саха сиригэр кэлэн олорорун иһиттэн-хомуостан көрөн билиэхтээх. Ону тэҥэ, дойдубут туһунан кэпсиир, көрдөрөр сувенирдар, киэргэллэр атыылара кэҥиэхтээх эбит. Онуоха, сынньана кэлээччи, атын дойдуттан ыалдьыт толору дуоһуйууну ылан барарыгар урбаанньыт кыһаллыахтаах, күүһүн ууруохтаах.
