Төхтүрдэр улуус киинигэр айаннаабакка, идэлээх парикмахерга дьиэлэриттэн тэйбэккэ баттах кырыттарар, кырааскалатар, араас бүрүчүөскэ оҥорторор буолбуттара хаһыс да сыллара. Ол курдук, Төхтүр нэһилиэгин олохтооҕо Александра ПАВЛОВА дьиэтигэр парикмахерскай арынан үлэлэтэр, биир дойдулаахтарыгар өҥө арааһын оҥорор.
4 оҕо иһирэх ийэтэ, бэйэ дьарыктаах Александра бу нэһилиэнньэҕэ наадалаах уонна туһалаах өҥөтүн 2020 сыллаахха, пандемия кэмигэр, саҕалаабыта.
— Бу иннинэ араас идэҕэ бэйэбин холонон, боруобалаан көрбүтүм. Ол эрээри баттах кырыйарбын туохтааҕар да ордорбутум. Улахан уолум кыратыгар баттаҕын хайа да парикмахерскайга кырыттардаҕына сөбүлээбэт этэ. Ол иһин бэйэм баттах кырыйа үөрэнэргэ санаммытым. 2016 сыллаахха идэ ылан бараммын Дьокуускайга үлэлээн саҕалаабытым. Санкт-Петербург, Москва биллэр-көстөр маастардарын куурустарыгар куруук үөрэнэн идэбин үрдэтинэбин. Билигин эр киһи, дьахтар, оҕо да баттаҕын кырыйар, кырааскалыыр маастарбын, — диэн кэпсиир Александра.
Улуус социальнай харалтаҕа управлениетын нөҥүө социальнай хантыраак баттаһан Александра дьиэтигэр кыра сыһыарыы туттан билигин бэйэтэ айар-тутар, үлэлиир муннуктаах. Дьиэ кэргэн сүбэтинэн кэргэнэ парикмахерскайын толору хааччыллыылаах, уулаах-хаардаах гына оҥорон биэрэн, Александра кырааскалааһын араас тиэхиньикэтин, уустук көрүҥүн баһылаабыт колорист буолар.
Мин Александраҕа сылдьар кэммэр дьүөгэлэрин үбүлүөйүгэр бараары аҕам саастаах эбээлэр кэлэн бүрүчүөскэ оҥорторон, баттах кырааскалатан бардылар. Кинилэр нэһилиэктэригэр маннык өҥөну оҥоруу тэриллибиттэн үөрүүлэрэ үгүс, саастаах дьон айанныырбытын ыарырҕатабыт, оттон Александраҕа хаһан баҕарар суруттаран сылдьабыт дэһэллэр.
— Нэһилиэгим эрэ дьоно буолбакка, чугастыы Өктөмтөн тиийэ кэлэр клиеннэрдээхпин. Ону сэргэ, АГАТУ филиалын устудьуоннара, Чапаевоттан үөрэнээччилэр эмиэ анаан-минээн кэлэн баттах кырыйтаран, оҥорторон бараллар. Клиеннэрим баҕаларын мэлдьи истэбин, толорорго дьулуһабын. Баҕа баар буоллаҕына, киһи барыны сатыырга үөрэнэр эбит. Саҥа саҕалааһынтан куттаммакка ылсан иһэр ордук уонна билигин судаарыстыбаттан бэйэ дьыаланы тэринэргэ өйөбүл көрүллэр, ону мүччү тутумуохха наада, — диир универсал-маастар.