Аммаҕа дьарыктаах буолуу киинэ уонна үөрэх салалтата көҕүлээһиннэринэн үлэлээх буолуу бүтүн Арассыыйатааҕы дьаарбаҥка уонна «Мин инники идэм» улуустааҕы бырайыак иитинэн «Амма устун профтур» диэн кыттыгас тэрээһин ыытылынна. Бу күн улуус оскуолаларын 6-11 кылааһын үөрэнээччилэрэ барыта 20 тэрилтэҕэ бэйэлэрин баҕаларынан талан сырыттылар. Оҕолор тэрилтэлэргэ салайааччылары, исписэлиистэри кытта көрүстүлэр, үлэлиир дьиэлэрин-уоттарын, миэстэлэрин көрдүлэр, тугу үлэлииллэрин, идэлэрин туһунан элбэҕи биллилэр, дьарыктарга кытыннылар. Аан маҥнай ыытыллыбыт улахан тэрээһин идэлээх дьон, педагогтар уонна оҕо аймах биһирэбилин ылла.
Амма улууһун киинигэр ыытыллыбыт экскурсияҕа оҕолор сэҥээриилэрин ордук ис дьыала салаата (169 оҕо), оройуон суута (111оҕо), улуустааҕы балыыһа (95 оҕо), борокуратуура (87 оҕо), биисэнэс инкубатор (87 оҕо), баһаарынай сулууспа (65 оҕо), улуустааҕы бибилэтиэкэ (50 оҕо) ыллылар. Сэргэх, интэриэһинэй көрсүһүүлэри ыыппыт тэрилтэлэр эппиэттээх дьонноругар, чуолаан, Марфа Пинигинаҕа (улуустааҕы кииннэммит балыыһа), Евгений Шадриҥҥа (ОДьКХ), Иван Зедгенидзевкэ (баһаарынай сулууспа), Лилия Никифороваҕа, Мотрена Увароваҕа, Николай Турантаевка (ИДьО), Аграфена Матвееваҕа (улуус дьаһалтата), Александра Николаеваҕа (биисэнэс-инкубатор), Саргылана Прокопьеваҕа («Амма» астыыр-үөллүүр комплекс), Семен Платоновка («Давидофф» ХЭТ), Михаил Николаевка (борокуратуура), Анна Макароваҕа (Россельхозбаан), Маргарита Парфеноваҕа (айылҕа харыстабылын иниспиэксийэтэ), Санаайа Пуховаҕа (улуустааҕы суут), Валерий Дьячковскайга (РЭС), Сахаайа Старостинаҕа (бэтэринээриийэ салалтата), Галина Никифороваҕа (эдэр натуралистар ыстаансыйалара), Саргылана Федороваҕа (эдэр туристар ыстаансыйалара), Фекла Санниковаҕа (Ф.Ф.Потапов аатынан норуот айымньытын дьиэтэ), Елизавета Сидороваҕа (улуустааҕы бибилэтиэкэ), Егор Слепцовка (Якутлесресурс), Саргылана Никитинаҕа (ойуур хаһаайыстыбата) улахан махтал тылларын тириэрдэбит.
Лилиана Адамова, Сатаҕай орто оскуолатын 10 кылааһын үөрэнээччитэ: «Аммаҕа биһигини төрөппүт Раиса Игоревна Скрябина арыаллаан аҕалла. Бэйэбит баҕабытынан сэттэ тэрилтэҕэ тиийэммит олус интэриэһинэй экскурсияларга сырыттыбыт. Балыыһаҕа медиктэр бэйэлэрин идэлэрин сиһилии кэпсээтилэр, процедуралары көрдөрдүлэр уонна түмүккэ баҕалаах эрэ буоллаххытына эмчит идэтин талыҥ диэтилэр. Баһаарынай чааска баһаарынайдар ханнык баҕарар балаһыанньаҕа куруук бэлэм сылдьар, ыксаллаах түгэн буолла да кинилэр саамай наадалаах дьон буолалларын бэлиэтээтилэр. Кулуупка исписэлиистэр хайдах, тугу үлэлииллэрин кэпсээтилэр, дьиэлэрин-уоттарын көрдөрдүлэр. Олоҥхо ыһыаҕар бэлэмнэнии бөҕө бара турар эбит. Маны тэҥэ оҕолору муусука үнстүрүмүөннэригэр оонньоон көрөллөрүгэр көҥүллээтилэр. Улуус дьаһалтатыгар салайааччылар туһунан сиһилии биллибит, кабинеттары кэрийэн көрдүбүт, архыыпка киирэммит урукку докумуоннары билистибит. Мин оскуолабын бүтэрдэхпинэ убайдарым курдук юрист буолар баҕалаахпын. Биир убайым Владислав Дьокуускайга ХИФУ-га, биир убайым Намыын Екатеринбург куоракка үөрэнэннэр юрист идэтин ылбыттара. Ол иһин мин эмиэ юрист буолар баҕалаах буоламмын ис дьыала салаатыгар, борокуратуураҕа, оройуон суутугар анаан тиийэммин ордук болҕойон, сэҥээрэн иһиттим. Ис дьыала салаатыгар ханна үөрэниэххэ сөбүн туһунан олус интэриэһинэйдик кэпсээтилэр. Хабаровскайга үчүгэй үөрэх кыһата баарын аан маҥнай иһиттим уонна тута ол куоракка туттарсарга быһаарынным. Манна үөрэнэргэ Саха сириттэн 6-7 миэстэ көрүллэрэ эмиэ олус көмөлөөх эбит. Оройуон суутугар буруйу оҥорбут дьон сууттанар саалаларын көрдүбүт. Ыар буруйу оҥорбуттар дьыалалара манна үйэ–саас тухары хараллар эбит. Борокуруор бэйэтэ идэтин туһунан олус интэриэһинэйдик кэпсээтэ. Киһи биир сиргэ олоруо суохтааҕын, бэйэтин сайыннаран иһиэхтээҕин өйдөөтүм. Идэ таһымын үрдэтэн Москуба, Санкт-Петрбург курдук куораттарга үөрэнэллэр эбит. Аны борокуруор буолбут киһи биир сиргэ олохсуйан үйэтин-сааһын тухары үлэлээбэт, ол курдук атын-атын сирдэргэ көһө сылдьан үлэлиир уратылаах эбит. Кылааһым оҕолоро экскурсияны эмиэ олус астыннылар, наһаа элбэҕи биллилэр. Билигин туох баар иһитиннэрии барыта интэриниэккэ барыта баар. Ол гынан баран идэлээх дьону кытта утары көрсөн олорон кэпсэппиппит, бэйэлэриттэн элбэҕи ыйыталаһан билбиппит, истибиппит олус туһалаах буолла. Кинилэр тус санааларын аһаҕастык үллэстибиттэрэ биһигини толкуйдатар, үлэҕэ уопуттаах дьон сүбэлэрэ-амалара инники олохпутун оҥосторбутугар улахан көмө буолуоҕа. Ис сүрэхтэриттэн кыһаллан туран биһиэхэ кэпсээбит идэлээх дьоҥҥо уонна экскурсияны тэрийбиттэргэ оскуолам аатыттан улахан махталбын тириэрдэбин. Маннык тэрээһин куруук ыытылла турдун, оҕо идэтин таба таларыгар тирэх буоллун.»
